Slyddu­él norðan­til en þurrt og bjart sunnan heiða

Á vef Veðurstofunnar segir að á norðanverðu landinu megi búast við einhverjum skúrum eða slydduéljum, en snjóéljum á heiðum, og um miðjan dag bæti í úrkomu um tíma. Sunnan heiða verður hins vegar yfirleitt þurrt og bjart veður.

Hiti tvö til tíu stig yfir daginn, mildast allra syðst, en víða líkur á næturfrosti.

„Keimlíkt veður á morgun, en þó bætir heldur í vind austast á landinu og sumar spár gera ráð fyrir samfelldri úrkomu þar fyrri part dags.

Hægari vindur á laugardag og léttir til fyrir norðan, en stíf norðvestanátt austantil fram eftir degi með lítilsháttar úrkomu.

Um kvöldið snýst svo í vestlæga átt og á sunnudag er útlit fyrir að það hlýni með vætu víða um land,“ segir í hugleiðingum veðurfræðings.

Veðurhorfur á landinu næstu daga

Á föstudag: Norðan og norðvestan 8-15 m/s, hvassast austanlands. Skúrir eða él á Norður- og Austurlandi, annars bjart að mestu. Hiti 1 til 8 stig, en allvíða næturfrost.

Á laugardag: Norðvestan og norðan 3-10 og bjart með köflum, en 10-15 austanlands og dálitlar skúrir eða slydduél fram eftir degi. Heldur hlýnandi. Vestan 5-13 um kvöldið og þykknar upp um landið vestanvert.

Á sunnudag: Vestan og suðvestan 8-13 og rigning með köflum. Hiti 4 til 11 stig.

Á mánudag (haustjafndægur): Breytileg átt og stöku skúrir. Hiti breytist lítið.

Á þriðjudag: Suðlæg átt og rigning með köflum, en þurrt um landið norðaustanvert. Hiti 7 til 12 stig.

Á miðvikudag: Breytileg átt og líkur á vætu víða um land.