Rúm­lega þriðjungs sam­dráttur í olíu­vinnslu í Rúss­landi

Rússneskir miðlar sögðu frá því í dag að undir lok september hafi framleiðslugetan dregist saman um 338 þúsund tonn af olíu á dag. Það eru um 38 prósent af allri framleiðslugetu Rússlands á olíu.

Drónaárásir Úkraínumanna eru helsta ástæðan fyrir ástandinu en um sjötíu prósent af samdrættinum er til kominn vegna þeirra. Hin þrjátíu prósentin eru sögð til komin vegna bilana og annarra ástæðna.

Talið er að viðgerðir gætu tekið langan tíma og hefur almennu viðhaldi á vinnslustöðvum víða verið frestað til að sporna gegn samdrættinum. Það gæti haft slæm áhrif til lengri tíma.

Fregnir af vandræðum við olíuframleiðslu í Rússlandi hafa heyrst reglulega á undanförnum vikum og mánuðum, samhliða mikilli aukningu í árásum Úkraínumanna á vinnslustöðvar og olíuinnviði í Rússlandi.

Sjá einnig: Nálægt því að draga úr flæðinu vegna drónaárása

Yfirvöld í Rússlandi tilkynntu í gær að framlengja ætti útflutningsbann á bensíni og setja takmarkanir á sölu dísilolíu frá Rússlandi út árið. Markmiðið væri að koma stöðugleika á eldsneytismarkað í landinu.

Fregnir af bensínskorti hafa orðið tíðar á undanförnum vikum og þá sérstaklega frá austurhluta Rússlands og hernumdum svæðum í Úkraínu, samkvæmt fólki sem hefur verið að fylgjast með þeim fregnum.

Á Krímskaga má enginn kaupa meira en tuttugu lítra af eldsneyti, samkvæmt Kommersant.

Á blaðamannafundi sem haldinn var í dag sagði Alexander Novak, aðstoðarforsætisráðherra, að takmarkanir á sölu eldsneytis úr landi yrðu felldar niður þegar framleiðsla færi aftur fram úr innlendri eftirspurn.

Samkvæmt TASS fréttaveitunni sagði Novak einnig að stjórnvöld Rússlands hefðu tök á ástandinu og orkumálaráðuneytið ynni með ráðamönnum í öllum héruðum landsins til að tryggja að nægar birgðir væru til.

Forsvarsmenn hagsmunasamtaka bensínstöðva í Rússlandi vöruðu þó við því á dögunum, í bréfi sem sent var til Novaks, að vegna samdráttar í framleiðslu, hækkandi bensínverðs og tafa á sendingum, væri mikil hætta á því að sjálfstætt reknar bensínstöðvar yrðu gjaldþrota í náinni framtíð.

Kommersant hefur eftir forsvarsmönnum samtakanna að þegar væri búið að loka þó nokkrum slíkum bensínstöðvum.

Eldur kviknaði í einni af stærri olíuvinnslustöðvum Rússlands í morgun. Ríkisstjóri héraðsins sagði að um slys væri að ræða en ekki árás og hafa engin myndbönd af drónum á sveimi þar verið í dreifingu á samfélagsmiðlum í dag, eins og gerist iðulega í slíkum árásum.