Búnir að gefast upp á fríum stæðum við TBR

Það eru íbúar í Langholtshverfi sem vekja athygli á því á Facebook-hópi íbúa að gjaldskylda sé hafin við bílastæði íþróttahússins þar sem gestir hafa um árabil skellt sér í badminton. Þar er birt mynd af tilkynningu við bílastæðið þar sem kemur fram að gjaldskylda hafi hafist þann 14. nóvember. 

Ástþór Þórhallsson framkvæmdastjóri TBR segir í samtali við Vísi að ástæða gjaldtökunnar sé einfaldlega sú að bílaplanið sé vel sótt og gjarnan yfirfullt. Það hafi reynst félagsmönnum og starfsfólki erfitt að fá stæði.

„Og það er nú bara ástæðan fyrir þessu, að tryggja að okkar félagsmenn geti lagt hérna. Síðustu árin samhliða uppbyggingu í hverfinu höfum við átt erfitt með að fá stæði sjálf og því var þessi ákvörðun tekin,“ segir Ástþór. Fólk í öðrum erindagjörðum en badmintonerindagjörðum hafi gjarnan lagt í stæðin.

Langflestir sáttir

„Það eru langflestir félagsmenn ánægðir með þetta og síðan þetta fór upp höfum við séð mikla breytingu á nýtingu á stæðunum og í morgun þegar ég mætti var vissulega ansi tómt á bílastæðinu, ekki að maður vilji ekki að það sé í nýtingu en þetta er á okkar lóð og við sjáum um að reka bílastæðið, snjómokstur, viðhald, allt kostar þetta. Þetta er ekki gert í neinu öðru skyni en að passa upp á okkar félagsmenn og að þeir geti notað stæðin.“

Ástþór segir Gulur.is sjá um gjaldskylduna, það fyrirtæki hafi ýmsa kosti, ekki síst þá að það nýti sér Autopay.ie þannig ekki þurfi app til þess að greiða auk þess sem fyrirtækið innheimti ekki innheimtugjöld af eldri borgurum. „Þannig er hægt að fara inn á Autopay.io eftir á og greitt innan 48 klukkustunda, sem okkur finnst vera sanngjarnt. Þeir eru líka ekki með færslugjöld eins og Parka og EasyPark og líka með lægstu innheimtugjöldin.“