Erfitt að fylla skarð Marios: „Þurfum að finna nýjar lausnir“

„Þetta er beggja blands. Auðvitað auðveldar þetta einhvers konar hvatningu. Það er ekki allt með okkur, menn þurfa að stíga upp og aðrir fá tækifæri. Menn þurfa að bæta við sig snúningi,“ sagði Rúnar við Vísi eftir leikinn í Njarðvík í kvöld.

„En ég ætla ekki að ljúga að þér, síðustu helgi og inn í vikuna var maður ótrúlega svekktur bæði fyrir hönd Marios og okkar liðs. Það er erfitt að fá hans ígildi til baka, hann er íslenskur leikmaður og þetta breytir aðeins hvernig við horfum á hlutina. Við þurfum að finna nýjar lausnir og finna hvar við erum settir þar.“

En hvernig fannst Rúnari Njarðvíkingar svara mótlætinu í leiknum í kvöld?

„Mér fannst við svara þessu flott. Menn eru að spila í öðrum stöðum, Dwayne Lautier er að spila meira í fjarkanum en hann getur nýst okkur rosa vel þannig. Þegar hann kom inn á undir lokin í þristinum bað hann um að vera í fjarkanum því það býr til nýja möguleika fyrir hann sem við erum að vinna með,“ svaraði Rúnar.

„En heilt yfir voru allir tilbúnir. Guðmundur Aron [Jóhannesson], sem hefur lítið spilað, kemur inn, á flottar mínútur og setti stórt skot niður í fyrri hálfleik.“

Varnarleikur Njarðvíkur hefur ekki verið sterkur framan af tímabili en jákvæð teikn hafa verið á lofti hvað vörnina varðar í síðustu tveimur leikjum, gegn KR og Ármanni.

„Æfingavikan hefur snúið um það að laga smáatriði og vinna í þeim. Það er fullt sem við getum bætt. Þetta snýst meira og minna um samskipti, sérstaklega þegar við erum að breyta á milli afbrigða og hlutverka hjá leikmönnum,“ sagði Rúnar.

„Við erum búnir að gera fínt en við erum ekki að spila gegn bestu sóknarliðunum þótt Ármenningar hafi skorað mikið í sínum leikjum. Markmiðið í kvöld var að gera Braga Guðmundssyni erfitt fyrir í kvöld og hann hitti úr þremur af ellefu skotum sínum sem er það minnsta sem hann hefur gert á tímabilinu. Það er frábært að við séum að finna smá lykt af því að vera með hlutina á hreinu í vörninni,“ bætti Rúnar við.