Til í að taka á móti FDA hve­nær sem er

Alvotech tilkynnti í dag að Lisa Graver myndi taka við stöðu forstjóra Alvotech af Róbert í lok fyrsti ársfjórðungs ársins. Róbert yrði áfram stjórnarformaður félagsins og það í fullu starfi. Róbert er stærsti eigandi Alvotech.

Í samtali við Vísi segir Róbert að breytingarnar hafi verið í farvatninu nokkuð lengi. Hann hafi stofnaði félagið árið 2012, orðið stjórnarformaður þess árið 2019 og loks forstjóri árið 2023.

„Félagið var þá á ákveðnum tímamótum, það þurfti að gera ákveðnar breytingar. Ég var beðinn af stjórninni að stíga inn og gerði það. Þannig að ég hef verið stjórnarformaður og forstjóri, sem er nokkuð þekkt í Bandaríkjunum en ekki í Evrópu og hef því oft verið spurður um það af hverju ég sé í þessum tveimur störfum,“ segir hann.

Allir lykilstarfsmenn búsettir á Íslandi

Róbert segist hafa unnið að því undanfarið að tryggja að allir lykilstjórnendur Alvotech séu búsettir á Íslandi en hann er sjálfur búsettur erlendis ásamt fjölskyldu sinni. Nú sé svo komið að stjórnendur rekstrarsviðs, gæðasviðs, þróunarsviðs, skráningarsviðs og  fjármálasviðs búi allir á Íslandi.

„Að vera forstjóri í svona félagi krefst mikillar viðveru í Reykjavík vegna þess að við erum að stækka hratt og allt leiðtogateymið þarf að vera saman, til þess að tryggja að innviðir, afköst, gæðamál og rekstrarmál fylgi vextinum.“

Lisa hafi þegar fest sér húsnæði hér á landi og muni flytja til landsins innan örfárra vikna og því verði forstjórinn einnig búsettur á landinu.

Einbeitir sér að öðrum verkefnum

Sem áður segir verður Róbert í fullu starfi sem stjórnarformaður og hann segist alls ekki á leið í neina afslöppun, hann muni slappa af seinna. Hann muni einbeita sér að þeim verkefnum sem hann sinnti áður en hann varð forstjóri, til að mynda að ná í nýja viðskiptavini, tryggja sölusamninga, fá nýja fjárfesta inn í félagið, vera í samskiptum við fjárfesta og þar fram eftir götunum.

„Það eru mikil tækifæri þarna enn þá. Þessi iðnaður er í dag enn þá á töluverðri hreyfinu. Við erum að selja öll okkar lyf í gegnum þriðja aðila, hvort það sé endilega besta nálgunin um ókomna framtíð skal ég ekki segja. Hvort við getum fært okkur yfir í ný tækifæri þegar kemur að þróun og hvernig lyf við erum að velja til að þróa. Slíkar stefnumótandi ákvarðanir krefjast undirbúnings og athygli. Mitt starf verður því áfram að gera það sem ég var að gera fyrir 2023, að halda áfram að byggja upp reksturinn til lengri tíma og verðmæti fyrir hluthafa.“

Á sama tíma sé hann kominn með gríðarlega öflugt teymi sem búi á Íslandi og sinni daglegum rekstri félagsins.

„Það er rosalega erfitt að vera forstjóri í félagi sem er að vaxa um hundrað prósent á ári, er komið með stærsta lyfjasafn í þróunaf öllum fyrirtækjum í okkar grein í heiminum og vera líka á sama tíma að reyna að komast inn á nýja markaði, skoða tækifæri til að fara jafnvel beint inn á nýja markaði með því að selja sjálf, ef það gæti reynst fyrirtækinu betur. Í svona miklum vexti þá fannst mér þetta rétti tímapunkturinn til að skipta þessum hlutverkum aftur upp.“

Til í að taka á móti FDA hvenær sem er

Undanfarna mánuði hafa fréttir ítrekað verið fluttar af dræmu gengi Alvotech á hlutabréfamörkuðum en félagið er þrískráð á markaði hér á landi, í Svíþjóð og í Bandaríkjunum. Til dæmis er gengi hlutabréfa félagsins hér á landi 592 krónur á hlut en það fór hæst upp í 2450 krónur í febrúar árið 2024.

Róbert segir að í fyrra hafi vöxtur félagsins, bæði í sölu og EBITDA, verið talsverður en þó minni en vonir höfðu staðið til. Hann sé þó bjartsýnn varðandi framtíðina.

„Eins og staðan er í dag erum við, samkvæmt opinberum gögnum, með langstærsta lyfjasafnið í þróun, sem er auðvitað ávísun á það sem félagið getur í raun og veru skilað í framtíðinni. Við erum búin að setja þessi fimm lyf á markað á stærstu mörkuðum, nema í Bandaríkjunum. Ég lít svo á, og stjórn félagsins líka, að þó að við höfum, því miður, fengið þetta neikvæða svar við umsóknum um markaðsleyfi fyrir nýju lyfin frá FDA þá er þetta einungis tímabundið ástand og félagið er í sjálfu sér tilbúið að taka á móti FDA [Lyfjaeftirliti Bandaríkjanna], ef þau kjósa að koma, hvenær sem er.“

Virði félagsins frekar í lyfjasafninu en markaðsgengi

Róbert segir að félagið hafi þegar gefið út áætlanir fyrir nýhafið ár og reikni með áframhaldandi sterkum vexti árið 2027. Þá verði þrjú lyf komin inn á Bandaríkjamarkað fyrir heilt ár. Þá sé fjöldi lyfja í pípunum og á leið inn á markað.

„Þannig að ég er mjög spenntur og brattur, enda mjög stór hluthafi. Ég er auðvitað ekki ánægður með gengið á félaginu, en svona að ákveðnu leyti stýrir maður því ekki, nema að skila þeim árangri sem þarf á hverjum tíma. Ég held að undirliggjandi verðmæti félagsins endurspeglist meira í lyfjasafninu heldur en genginu á bréfunum akkúrat í dag. Þannig að ef menn horfa bara á afköstin, þau lyf sem eru að koma á markað og allt það sem við erum að gera, þá segir það sína sögu sjálft. Þannig að ég er í raun og veru bara mjög brattur og ánægður með að vera stærsti hluthafinn í félaginu og ætla að vera það áfram.“