Ó­venju­lega hlýr desem­ber

Í tilkynningu Veðurstofunnar segir að jólin hafi verið sérstaklega hlý, þegar sunnanhvassviðri gekk yfir landið.

Nýtt desemberhámarkshitamet hafi verið sett þegar hiti mældist 19,8 stig á Seyðisfirði seint á aðfangadagskvöld.

„Meðalhiti í byggðum landsins var 3,0 stig sem er þremur stigum yfir meðallagi áranna 1991 til 2020. Á landsvísu var þetta þriðji hlýjasti desembermánuður frá upphafi mælinga. Það var hlýrra í desember 1933 og 2002.“

Úrkoma undir meðallagi

Hæstur hafi meðalhiti mánaðarins verið á Steinum undir Eyjafjöllum, um 6,5 stig.

Meðalhitinn í Reykjavík hafi verið 4 stig, 3,3 stigum yfir meðallagi áranna 1991 til 2020 og 3,7 stigum yfir meðallagi síðustu tíu ára.

Á Akureyri hafi meðalhitinn verið 2,4 stig.

Fram kemur að úrkoma hafi verið undir meðallagi um mestallt land í mánuðinum, en töluverð úrkoma hafi verið dagana 23, - 26., sérstaklega á Snæfellsnesi og Vestfjörðum.

„Úrkoma í Reykjavík mældist 76,2 mm sem er 80% af meðalúrkomu áranna 1991 til 2020. Á Akureyri mældist úrkoman 45,7 mm sem er um 65% af meðalúrkomu áranna 1991 til 2020. Í Stykkishólmi mældist úrkoman 83,8 mm og 110,6 mm á Dalatanga.“

„Dagar þegar úrkoma mældist 1,0 mm eða meiri í Reykjavík voru 14 sem eru jafnmargir og í meðalári. Á Akureyri mældist úrkoman 1,0 mm eða meiri 8 daga, sem er 4 færri en venjulega.“

Nánar má lesa um veðrið í desember á vef Veðurstofunnar.