Mátti ekki koma inn á vegna þess að hún var með eyrnalokk

Hin franska Cascarino kom til West Ham á láni frá Juventus í síðustu viku. Hún byrjaði á varamannabekknum þegar West Ham mætti Chelsea í ensku úrvalsdeildinni í gær en gerði sig tilbúna til að koma inn á í byrjun seinni hálfleiks.

Cascarino var hins vegar bannað að fara inn á völlinn þar sem hún var með eyrnalokk. Hún setti límband yfir hann en samkvæmt reglum enska knattspyrnusambandsins er bannað að spila með skartgripi.

Cascarino gat ekki tekið eyrnalokkinn úr eyranu og því varð hún að setjast aftur á bekkinn og gera sér að góða að fylgjast með seinni hálfleiknum þaðan.

West Ham tapaði leiknum gegn Englandsmeisturum Chelsea með fimm mörkum gegn engu. Hamrarnir eru í ellefta og næstneðsta sæti ensku deildarinnar með aðeins fimm stig eftir tólf leiki.

Hin 28 ára Cascarino hefur leikið sextán landsleiki fyrir Frakkland. Hún er tvíburasystir Delphine Cascarino, leikmanns franska landsliðsins og San Diego Wave í Bandaríkjunum.