Vitum ekki um tvo fyrstu mót­herjana fyrr en annað kvöld

Ísland mun mæta annaðhvort Króatíu eða Svíþjóð í fyrstu tveimur leikjum sínum í milliriðli en það kemur ekki í ljós hvort liðið spilar við strákana okkar á föstudaginn.

Króatar og Svíar hafa tryggt sig áfram í milliriðil en spila hreinan úrslitaleik um sigurinn í honum annað kvöld. Stigin sem liðin vinna sér inn í þeim leik fylgja þeim líka áfram í milliriðilinn.

Það lið sem tapar þessum leik annað kvöld mætir íslensku strákunum á föstudaginn en það lið sem vinnur spilar við Ísland á sunnudaginn.

Íslenska landsliðið mætir svo Svisslendingum í þriðja leiknum sínum í milliriðlinum á þriðjudaginn í næstu viku og lokaleikurinn er síðan daginn eftir á móti Slóvenum. Slóvenar fóru með tvö stig í milliriðilinn alveg eins og íslenska liðið.