Ragna í nýju hlut­verki hjá TBR

Ragna keppti tvisvar í badminton fyrir Íslands hönd á Ólympíuleikunum, í Peking 2008 og í Lundúnum 2012. Alls á hún að baki tuttugu Íslandsmeistaratitla í badminton og hæst náði hún 37. sæti heimslistans, þá var hún einnig meðal tíu efstu í einliðaleik kvenna á Evrópumótaröðinni.

Ragna er með BA gráðu í heimspeki og sálfræði og er lærður jógakennari og heilsunuddari. Hún er nú í meistaranámi í íþróttavísindum með íþróttasálfræði sem sérgrein í Háskólanum í Reykjavík.

Ragna hefur starfað síðustu ár sem þjálfari hjá TBR en félagið segir þessa breytingu marka nýja tíma. Með henni fáist skýrari sýn á framtíð félagsins, sem samræmist metnaði stjórnar og félagsins að efla enn frekar grasrótarstarf, afreksstarf og framþróun innan félagsins.

„Ástríða mín er íþróttir, íþróttafólk og íþróttahreyfingin á Íslandi. Ég hef unnið við ýmislegt tengt íþróttum í gegnum tíðina, m.a. starfaði ég sem verkefnastjóri hjá Íþrótta- og Ólympíusambandi Íslands í sjö ár og þekki því íþróttahreyfinguna vel. Ég hef mikla reynslu úr íþróttaheiminum, en ég æfði badminton í 21 ár og þar af í 11 ár sem atvinnumaður. Ég öðlaðist dýrmæta reynslu í gegnum feril minn í badmintoninu, þar sem ég ferðaðist um allan heim og keppti á alþjóðlegum mótum til þess að koma mér sem hæst á heimslista og spila á meðal bestu einliðaleikskvenna í heimi. Sú reynsla nýtist mér vel í leik og starfi í dag“ sagði Ragna.

„Markmið mitt í starfi íþróttastjóra afreks- og þróunarmála er að byggja upp markvisst og faglegt afreksumhverfi í TBR. Ég vil leggja áherslu á að styrkja iðkendur sem hafa skýra sýn og metnað og veita þeim heildræna og einstaklingsmiðaða þjálfun. Við í TBR viljum fjölga iðkendum sem stefna á alþjóðlega mótaþátttöku, vilja koma sér ofar á heimslista og stefna á keppni á Evrópu- og heimsmeistaramótum ásamt Ólympíuleikum. Lykilatriði næstu ára hvað varðar þennan hluta starfsins er að byggja upp afreksmenningu í TBR þar sem fagmennska og metnaður eru í forgrunni og þar sem iðkendur fá þann stuðning sem þeir þurfa til að ná sínum hámarksárangri á heilbrigðan hátt.“