Guardiola segir að pressan sé á eyðsluseggjunum í deildinni

Guardiola sagði í gríni að hann væri „fúll“ vegna þess að félagið hans eyddi ekki meiru í janúarglugganum eftir að hafa upplýst að City er í sjöunda sæti yfir nettóeyðslu frá sumrinu 2021.

Manchester United, Arsenal, Chelsea, Tottenham og Newcastle hafa eytt meira nettó undanfarin fimm ár og stjóri City gaf í skyn að gagnrýna ætti þessi félög fyrir að vinna ekki fleiri titla.

Ég er svolítið fúll út í þá

Aðspurður um að City hafi fengið bæði Antoine Semenyo og Marc Guéhi í janúar sagði Guardiola: „Já, virkilega gott. Ég er svolítið dapur og í uppnámi því í nettóeyðslu síðustu fimm ára erum við í sjöunda sæti í ensku úrvalsdeildinni,“ sagði Guardiola.

„Ég vil vera í fyrsta sæti. Ég skil ekki af hverju félagið eyðir ekki meiri peningum. Ég er svolítið fúll út í þá,“ sagði Guardiola.

„En eins og við unnum áður vegna þess að við eyddum miklu, þá verða núna sex lið að vinna ensku úrvalsdeildina, Meistaradeildina og ensku bikarkeppnina því þau hafa eytt meira undanfarin fimm ár,“ sagði Guardiola.

Þetta eru staðreyndir

„Þetta eru staðreyndir. Þetta er ekki skoðun. Þú getur haft skoðun, eins og þú segir að við spilum vel eða illa gegn Spurs – við getum verið sammála eða ósammála. En þetta eru staðreyndir. Gangi liðunum sex sem eru fyrir ofan okkur í nettóeyðslu síðustu fimm ára vel. Áfram með það. Ég bíð. Þetta er fín tilvitnun, er það ekki?,“ sagði Guardiola.

Guardiola á möguleika á að komast í sinn fimmta úrslitaleik í deildabikarnum þegar City mætir Newcastle í seinni undanúrslitaleiknum á Etihad-leikvanginum í kvöld.

Hann verður án Guehi, sem er ekki löglegur, á meðan verið er að meta stöðuna á Rayan Cherki eftir að hann fékk högg í 2-2 jafnteflinu gegn Tottenham á sunnudag.

Rúben Dias sneri aftur á æfingu á sunnudag og Guardiola verður að ákveða hvort hann eigi að hætta á að tefla portúgalska landsliðsmanninum fram.

Möguleiki á fimmta úrslitaleiknum á tíu árum

„Við eigum möguleika á að komast í okkar fimmta úrslitaleik á tíu árum í deildabikarnum,“ sagði Guardiola.

„Auðvitað myndi ég frekar vilja byrja með 2-0 forystu eftir góð úrslit [í fyrri leiknum], en ég veit hversu oft við spilum gegn Newcastle og metnaðinn sem þeir hafa sem Meistaradeildarlið. Við verðum að vera undirbúnir og sjá hvernig leikmennirnir jafna sig eftir erfiðan leik gegn Spurs og spila okkar leik með okkar fólki og okkar stuðningsmönnum og reyna að komast á Wembley í mars,“ sagði Guardiola.