Vinda­samt víða á landinu

Í hugleiðingum veðurfræðings á vef Veðurstofunnar segir að það verði slydda eða rigning á norðan- og austanverðu landinu og snjókoma til fjalla en skýjað með köflum og yfirleitt þurrt á Suður- og Vesturlandi. Í kvöld bætir svo heldur í vind við suðausturströndina.

Hiti verður á bilinu núll til sex stig, hlýjast syðst.

„Á morgun verður áframhaldandi norðaustlæg átt, allhvöss eða hvöss en við suðausturströndina og á Vestfjörðum þá gæti slegið í storm. Víða dálítil él en að mestu bjart sunnan- og vestantil. Kólnar heldur og víðst hvar frost annað kvöld,“ segir á vef Veðurstofunnar.

Veðurhorfur á landinu næstu daga

Á þriðjudag: Norðaustan 8-15 m/s, en hvassviðri við suðausturströndina. Él norðan- og austantil, en bjart með köflum á Suður- og Vesturlandi. Hiti um eða yfir frostmarki, en kólnar síðdegis.

Á miðvikudag: Norðaustan- og norðanátt 5-13 m/s og dálítil él, en bjart að mestu sunnanlands. Frost 1 til 8 stig.

Á fimmtudag: Norðlæg eða breytileg átt 3-10 m/s og dálítil él norðaustanlands, annars þurrt að mestu og víða bjart. Talsvert frost.

Á föstudag: Breytileg átt og víða líkur á éljum. Áfram kalt.

Á laugardag: Norðaustan- og austanátt og snjókoma, en hlýnar með slyddu við suðurströndina.

Á sunnudag: Norðanátt og snjókoma, en að mestu þurrt sunnantil.