For­setinn telur íþrótta­fólkið best til þess fallið að meta eigin stöðu

Eftir slysið hræðilega í brautinni í Cortina á sunnudaginn síðastliðinn, þar sem Vonn fótbrotnaði, hafa sprottið upp spurningar og umræður á þá leið hvort einhver hefði átt að stíga inn í og meina Vonn að taka þátt á Vetrarólympíuleikunum hafandi það í huga að aðeins um vika hafði liðið frá því hún sleit krossband í vinstra hné. 

Sumir vilja meina að þau meiðsli hafi orðið til þess að Vonn hafi síðan meiðst í brautinni á sunnudaginn en liðsfélagi hennar Keely Cashman, segir það af og frá og í færslu á samfélagsmiðlum í gærkvöldi sagði Vonn það heldur ekki standast skoðun. Hún hafi einfaldlega verið of innarlega á sinni keppnislínu í brautinni, fimm tommum of innarlega til að vera nákvæm.

Nú þegar hafa komið upp nokkur dæmi í tengslum við yfirstandandi Vetrarólympíuleika og meiðsli íþróttafólks. Hvar ákvörðunin varðandi þátttöku íþróttafólks sem glímir við meiðsli eigi að liggja. 

Umræðan hefur orðið háværari eftir meiðsli  Vonn en fyrir hafði norska skíðasambandið til að mynda tekið fyrir það að hin 26 ára gamla Marte Monsen tæki þátt á leikunum eftir meiðsli sem hún hlaut á móti skömmu fyrir leikana. 

Hólmfríður fékk ekki að segja af eða á

Þá er skemmst að minnast á mál er tengist íslensku skíðakonunni Hólmfríði Dóru Friðgeirsdóttur sem braut bein í sköflungi í byrjun desember á síðasta ári og gekkst undir aðgerð. 

Hólmfríður treysti sér til þess að keppa á Vetrarólympíuleikunum en Skíðasamband Íslands valdi hana ekki í landsliðshópinn og var ákvörðunin sögð tekin með hennar langtíma hagsmuni að leiðarljósi. 

„Ég verð bara að vera ósammála því og segja að ég ein sé best til þess fallin að meta mína langtíma hags­muni.“ sagði Hólmfríður í samtali við Vísi á sínum tíma en formaður Skíðasambandsins, Gísli Reynisson, sagði Hólmfríði í afneitun um alvarleika eigin meiðsla.

Allir meiddir

Alþjóða skíða- og snjóbrettasambandið (FIS) er sjálft ekki með eftirlit er varðar meiðslastöðu þátttakenda á Vetrarólympíuleikunum og er forseti sambandsins, Johan Eliasch, á því að íþróttafólkið sjálft sé best til þess fallið að taka ákvörðun um eigin þátttöku. 

„Í tilfelli Vonn þekkir hún sín meiðsli betur en nokkur annar. Ef þú horfir á íþróttafólkið hér á leikunum þá er hver og einn keppandi að glíma við einhvers konar smávægileg meiðsli,“ sagði Eliasch í samtali við AP fréttaveituna. 

Vonn, líkt og Hólmfríður Dóra, hafði ráðfært sig við sitt lækna- og sjúkrateymi sem og þjálfara áður en hún ákvað að keyra á þátttöku á Vetrarólympíuleikunum.