Hárið ekki notað í neina ræðu

Frank Ilett hefur vakið mikla athygli um allan heim með því að láta hár sitt vaxa þar til United tekst að vinna fimm leiki í röð.

Hann hefur beðið í 493 daga og framan af þessu tímabili hefur ekki verið mikið útlit fyrir að Ilett fari í klippingu. En svo tók Carrick við United og síðan þá hefur liðið unnið fjóra leiki í röð.

Þess vegna gæti hárið loksins fengið að fjúka í kvöld, þegar United sækir West Ham heim, og ætlar Ilett að fylgjast náið með leiknum og leyfa fylgjendum sínum að sjá viðbrögð hans í beinu streymi.

„Ég er meðvitaður um þetta. Krakkarnir mínir hafa séð til þess að ég viti af þessu. En ég er svo sannarlega ekki að fara að nota þetta í liðsræðuna, á faglegum nótum, en ég skil þetta,“ sagði Carrick þegar hann var spurður út í Ilett og hárið, og hélt áfram.

„Þetta fær mann til að brosa en þetta hefur nú ekki nein áhrif þegar allt kemur til alls.“