Tekur við formannsembættinu í skugga Epstein-tengsla

Birting fleiri gagna úr máli auðkýfingsins og barnaníðingsins Jeffrey Epstein hefur skekið norsk stjórnmál undanfarið. Það gustar hressilega um norsku konungsfjölskylduna vegna birtingar tölvupóstsamskipta Mette-Marit krónprinsessu. Á sama tíma standa yfir málaferli yfir syni hennar, Marius Høiby, sem er sakaður um fjölda kynferðis- og ofbeldisbrota.

Epstein-skjálfti skekur Noreg

Efnahagsbrotadeild norsku lögreglunnar gerði húsleit í íbúð Thorbjørns Jagland, fyrrverandi forsætisráðherra Noregs, á dögunum. Í kjölfarið var ákæra gefin út á hendur honum fyrir stórfellda spillingu á embættistíð sinni. Liður í því máli byggir á samskipstum hans við Jeffrey Epstein eftir að hann hafði verið dæmdur fyrir kynferðisbrot. Epstein virðist samkvæmt gögnunum hafa greitt fyrir margvíslegan ferðakostnað Jagland og fjölskyldu hans.

Stjórnskipunar- og eftirlitsnefnd norska Stórþingsins hóf á dögunum frumkvæðisathugun á tengingum Epstein í norskum stjórnmálum. Fyrr í vikunni beindi nefndin 29 spurningum til ríkisstjórnar Noregs en margar þeirra snúa að árunum 2019-2020 þegar Søreide var utanríkisráðherra í ríkisstjórn Ernu Solberg.

Eftir að eftirlitsnefnd berast svör við þessum 29 spurningum fer rannsókn í gang þar sem Søreide verður væntanlega gert að fara á fund nefndarinnar og svara fyrir það hvort hún hafi brugðist nægilega við miðað við þær upplýsingar sem hafi legið fyrir á hennar tíma í ráðherrastól.

„Allt upp á borðið“

Á dögunum kom það í ljós að utanríkisráðuneytinu með Søreide í ráðherrastól hefði borist tilkynning um möguleg tengsl International Peace Institute, hugveitu í eigu Terje Rød-Larsen fyrrverandi ráðherra, og Jeffrey Epstein. Sá fyrrnefndi er sakaður um að hafa notað hugveituna til að koma Epstein í samband við ungar stelpur.

Á blaðamannafundi sem Søreide hélt sjálf í gær gekkst hún við því að hún hefði getað sett í gang umfangsmeiri rannsókn á ábendingunni sem barst. Hún sagði að hún hafi ekkert að fela.