Segir að Grind­víkingar verði að passa vel upp á gömlu kallana

Tveir af þremur elstu leikmenn Bónus deildarinnar leika með Grindavík. Jeremy Pargo verður fertugur 17. mars og DeAndre Kane 37 ára 10. júní. Elsti leikmaður deildarinnar, Igor Maric, leikur með Val. Hann verður 41 árs í júlí.

Jón Halldór Eðvaldsson segir að eldri leikmenn geti reynst gulls ígildi.

„Maður er búinn að heyra þetta svo rosalega oft með lið sem eru með leikmenn sem eru í eldri kantinum. Hver átti ótrúlega stóran þátt í að Stjarnan varð Íslandsmeistari í fyrra? Það var Hlynur Bæringsson, 42 ára,“ sagði Jón Halldór í Bónus Körfuboltakvöldi.

Sævar Sævarsson segir ekki hægt að bera Hlyn saman við Pargo og Kane. Hlutverk þeirra sé ólíkt.

Þvílík vinna

„Hlynur var sjöundi eða áttundi leikmaður í Stjörnunni en burðarásar liðsins voru ungir og ferskir leikmenn. Þarna eru burðarásar liðsins í kringum fertugt. Ég talaði mjög mikið við Loga Gunnarsson undir það síðasta á hans ferli og hvernig hann höndlaði það. Þetta er þvílík vinna, dagleg vinna að halda sér í formi. Hvert einasta ár sem bætist við gerir þetta miklu flóknara,“ sagði Sævar.

„Þetta verður bara flókið þegar það eru bara tveir dagar milli leikja. Þess vegna er alveg eðlilegt að segja að best væri að þeir komist í gegnum þetta sem hraðast. En það sem ég held að skipti meira máli er að þeir stjórni mínútunum í fyrstu einvígunum. Að þeir séu ekki að spila þeim 35-38 mínútum. Ég veit ekki, eru mörg lið í hópíþróttum sem fara mjög langt með tvo byrjunarliðsmenn í kringum fertugt. Það dró af þeim báðum í fyrra,“ bætti Sævar við en Grindavík tapaði fyrir Stjörnunni í oddaleik í undanúrslitunum á síðasta tímabili.

Biðin kannski ekki góð

Jón Halldór er efins um að það sé gott fyrir Grindvíkinga að klára einvígi sitt í átta liða úrslitum sem fyrst.

„Punkturinn minn var að ég er ekkert viss um að það sé betra að þú vinnir 3-0 í átta liða úrslitunum og bíðir svo,“ sagði Jón Halldór.

Grindavík á deildarmeistaratitilinn vísan en liðið er með sex stiga forskot á toppi Bónus deildarinnar þegar fjórum umferðum er ólokið.

Innslagið úr Bónus Körfuboltakvöldi má sjá í spilaranum hér fyrir ofan.