Vonn þakkar lækni fyrir að vera enn með tvo fætur

Vonn lenti í harkalegu slysi í fyrstu ferð brunkeppninnar. Hún mölbraut á sér sköflunginn og varð fyrir ýmsum öðrum áverkum á fætinum.

Svo slæmt var ástandið, að hennar sögn, að blóðið flæddi óvenjulega í löppina. Vegna þess að álagið var svo mikið á sama stað.

Þá þurfti að meta hvort hægt væri að bjarga fótinum eða hvort þyrfti að aflima hana.

„Allir vöðvarnir, taugarnar og sinarnar voru í raun að deyja. En læknirinn Tom Hackett bjargaði mér og kom í veg fyrir að það þyrfti að aflima löppina“ sagði Vonn í færslu á Instagram í dag.

Vonn þakkaði fyrir það að Hackett hefði verið á svæðinu. Skurðlæknirinn var í viðbragðsstöðu vegna þess að hún var nýbúin að slíta krossband.

Ljóst er að Vonn á langa endurhæfingu framundan en hún er enn í hjólastól. Hún segist vona að bráðlega geti hún farið að ganga á hækjum, en það muni taka hátt í heilt ár þar til beinin gróa að fullu.

„Þetta hafa verið alvarlegustu, erfiðustu og sársaukafyllstu meiðsli sem ég hef lent í, sinnum hundrað“ sagði Vonn á Instagram.

Í færslunni lýsir hún nánar meiðslunum og aðgerðunum sem hún gekkst undir. Varað er við því að myndefnið sem þar fylgir er ekki fyrir viðkvæma.