Ó­trú­legur öldu­gangur og margt að mestu horfið

Hafþór Óðinsson leiðsögumaður birti í dag myndband á samfélagsmiðlum sem hann tók í fjörunni í morgun. Þar má sjá hvernig landrofið í fjörunni hefur haldið áfram. Greint var frá því fyrir um tveimur vikum að hin heimsfræga fjara væri gjörbreytt, sandurinn svo gott sem allur horfinn á braut og stuðlabergið komið út í sjó.

Ekkert lát á breytingunum

„Það var rosalegt að sjá fjöruna núna, gangvegurinn bara í rústi og malbik og grjót út um allt og greinilega orðið grjóthrun í fjallinu. Mér var sagt að þetta hefði allt gerst í morgun í veðrinu og svo er annað skiltið farið,“ segir Hafþór í samtali við Vísi. Hann birti myndböndin meðal annars á Instagram síðu sinni. 

Hann fer reglulega í Reynisfjöru, fór síðast fyrir um mánuði síðan og sá með eigin augum miklar breytingar frá því hann fór í desember en þá segir Hafþór að fjaran hafi enn verið í sinni upprunalegu mynd. Hafþór tók myndbönd á vettvangi og birti eitt í Baklandi ferðaþjónustunnar á Facebook og hefur myndbandið vakið mikla athygli.

„Það er magnað að sjá hvað þetta hefur breyst mikið á svona stuttum tíma,“ segir Hafþór sem bætir því við að enn sé eitt skilti eftir í fjörunni með ráðleggingum til ferðamanna.