Strætó fór út­af á Holta­vörðu­heiði

Björgunarsveitir á suðvestur- og vesturhluta landsins hafa fengið fjölda útkalla frá klukkan fimm í dag, samkvæmt tilkynningu frá Landsbjörgu.

Fyrsta útkallið var hjá Mannbjörg í Þorlákshöfn þar sem beðið var um aðstoð í bænum vegna óveðurs. Nokkru síðar bárust Hjálparsveit skáta í Reykjavík og Kyndli í Mosfellsbæ beiðni um aðstoð frá tveimur mönnum sem höfðu fest fjórhjól í djúpum snjó á Mosfellsheiði.

Mennirnir fundust fljótt en þeir voru fluttir blautir og kaldir í bíla björgunarfólks. Hjólin voru losuð og keyrð af heiðinni af björgunarmönnum og skilin þar eftir.

Á sjöunda tímanum barst svo áðurnefnt útkall vegna strætisvagnsins á Holtavörðuheiði. Hátt í tuttugu björgunarmenn fóru í það verkefni og fluttu farþega vagnsins niður af heiðinni og voru þeir sóttir í Staðarskála og fluttir áleiðis norður.

Ökumaður strætisvagnsins var sóttur að sunnan, samkvæmt tilkynningu Landsbjargar.

Á Snæfellsnesi var björgunarsveitin Lífsbjörg í Snæfellsbæ kölluð út til að aðstoða ferðamenn sem höfðu fest bíl á sunnanverðri Fróðarárheiði. Bíllinn var losaður og hélt fólkið sinni ferð áfram.

Ferðafólk lenti svo í kvöld í vandræðum á Hellisheiði og í Þrengslum, þar sem orðið var nokkuð blint og færð að spillast. Þá var Hjálparsveit skáta í Hveragerði og Mannbjörg í Þorlákshöfn kallaðar út til að aðstoða. Báðum leiðunum var lokað og fjölmörgum bílstjórum mun hafa verið hjálpað.