Logi fékk örn eftir að hafa slegið beint í holu af 76 metra færi

Logi Sigurðsson lék á sex höggum undir pari á fyrsta hring mótsins. Hann fékk einn örn, fjóra fugla og þrettán pör á hringnum og er einu höggi á eftir átta kylfingum sem deila forystunni, þeirra á meðal er Edoardo Molinari sem hefur þrisvar sigrað á Evrópumótaröðinni.

Golfsamband Íslands segir frá þessari frábæru spilamennsku á miðlum sínum.

Högg dagsins hjá Loga kom strax á annarri holu er hann sló beint ofan í holu af 76 metra færi og fékk glæsilegan örn.

Dagbjartur Sigurbrandsson lék á fjórum höggum undir pari í dag og hann var ásamt fjórum öðrum kylfingum á besta skori dagsins á Hills/Ruins vellinum. Nítján bestu skorin komu öll á Lakes vellinum í dag.

Hlynur Bergsson var á tveimur höggum undir pari, Aron Snær Júlíusson á einu höggi yfir pari, Svanberg Addi Stefánsson á fjórum höggum yfir pari, Daníel Ísak á fimm höggum yfir pari og Ólafur Marel Árnason á sex höggum yfir pari.