Þrír fluttir á slysa­deild ofan af Hellisheiðinni eftir tvo á­rekstra

Magnús Ragnarsson, aðalvarðstjóri hjá Lögreglunni á Suðurlandi, segir að um tvo aðskilda árekstra hafi verið að ræða á svipuðum slóðum. Þar að auki hafi þónokkrir bílar hafnað utan vegar enda akstursskilyrði fráleit.

Lokað var fyrir umferð um heiðina um tíma á meðan unnið var að því að tryggja vettvanginn en áfram eru veðurskilyrði mjög slæm og eiga bara eftir að versna, að sögn Magnúsar. Hann brýnir fyrir fólki að fresta ferðalögum. 

Einnig hefur verið lokað fyrir umferð um Mosfellsheiði eftir að rúta með tólf manns um borð hafnaði utan vegar. Engin slys urðu á fólki.