Stað­festa á­kvörðun um bann við full­yrðingum um bestu pakkaferðirnar

Travelshift þarf að greiða stjórnvaldssekt að fjárhæð 600 þúsund krónur og er sektin lækkuð um 100 þúsund krónur í úrskurði áfrýjunarnefndarinnar.

Fjallað var um ákvörðun Neytendastofu við lok árs 2024. Í tilkynningu á vef Neytendastofu segir að í ákvörðunni hafi Neytendastofa komist að þeirri niðurstöðu að félagið hafi viðhaft villandi viðskiptahætti og ekki uppfyllt skilyrði um að pakkaferðasamningur skuli vera skýr og á skiljanlegu og greinargóðu máli.

Neytendastofa bannaði Travelshift því að birta fullyrðingarnar og beindi fyrirmælum til félagsins um að skýra samninga sína.

Ákvörðun staðfesta að hluta

Í tilkynningu segir að áfrýjunarnefnd neytendamála hafi nú staðfest þann hluta ákvörðunarinnar sem bannar birtingu fullyrðinga um að Travelshift bjóði mesta úrvalið, bestu ferðir og ódýrustu, lægstu og bestu verðin auk þess sem staðfestur var sá hluti ákvörðunarinnar sem snýr að framsetningu fyrirtækisins á „verð frá“.

Áfrýjunarnefndin felldi hins vegar úr gildi þann hluta ákvörðunarinnar sem snýr að skilmálum pakkaferða Travelshift. Taldi nefndin skorta á rökstuðning fyrir ákvörðuninni og að ekki væri gerð nægilega grein fyrir því hvaða tilteknu atriði félagsins uppfylltu ekki þann almenna áskilnað að vera skýr og á skiljanlegu og greinargóðu máli.