Ingunn nýr innri endur­skoðandi borgarinnar

Áður var hún innri endurskoðandi Háskóla Íslands um sex ára skeið og byggði þar upp innri endurskoðun háskólans og tengdra stofnana frá grunni, mótaði verklag, kom að stofnun endurskoðunarnefndar og vann í nánu samstarfi við rektor, æðstu stjórnendur og Ríkisendurskoðun. Þar áður var hún meðal annars verkefnastjóri í áhættuþjónustu Deloitte.

Ingunn er fagvottaður innri endurskoðandi (CIA) og er auk þess með vottun í áhættustjórnun (CRMA). Hún er með B.A. gráðu í stjórnmálafræði frá Háskóla Íslands, M.A. gráðu í evrópskum stjórnsýslufræðum frá KU Leuven í Belgíu og M.A. gráðu í alþjóðasamskiptum frá University of Kent í Englandi.

Starf innri endurskoðanda Reykjavíkurborgar var auglýst 12. febrúar og bárust fimm umsóknir um stöðuna. Í samræmi við reglur um ráðningar borgarráðs í æðstu stjórnunarstöður var skipuð ráðgefandi hæfnisnefnd.

Í tilkynningu segir að í lokaskýrslu nefndarinnar segi að Ingunn sé best til þess fallin að gegna starfi innri endurskoðanda Reykjavíkurborgar með farsælum hætti. Menntun hennar og fagvottanir endurspegli traustan fræðilegan grunn og sérhæfða þekkingu sem nýtist sérstaklega vel hjá stórri samstæðu á borð við Reykjavíkurborg. „Hún uppfyllir þær menntunar- og hæfniskröfur sem gerðar voru til starfsins og hefur jafnframt sýnt í fyrri störfum sínum og í núverandi starfi hjá Reykjavíkurborg að hún hefur burði til að leiða innri endurskoðun og ráðgjöf af festu, fagmennsku og sjálfstæði.“