Fyrr­verandi eigin­konan hefur á­hyggjur af Tiger

Tiger velti bíl sínum þegar hann reyndi að taka fram úr annarri bifreið í Flórída á föstudaginn. Hann var handtekinn eftir að hafa sýnt merki þess að vera ölvaður. Tiger neitaði að skila þvagprufu og var ákærður fyrir akstur undir áhrifum.

Samkvæmt heimildum People hefur Nordegren talsverðar áhyggjur af Tiger eftir bílslysið. Þau eiga tvö börn saman, hina átján ára Sam og hinn sautján ára Charlie.

Heimildarmaður People segir að Nordegren óski Tiger alls hins besta og vonist til að hann setji heilsuna í forgang svo hann geti verið til staðar fyrir börnin sín.

Bílslysið á föstudaginn er það fjórða sem Tiger verður valdur af. Það fyrsta var 2009 en þá hrundi líf kylfingsins algjörlega. Upp komst um framhjáhald hans og í kjölfarið skildu þau Nordegren.

Tiger hefur glímt við erfið meiðsli undanfarin ár og þátttaka hans á mótum hefur verið stopul. Hann sneri þó aftur á golfvöllinn í síðustu viku þegar hann lék með liði sínu, Jupiter Links Golf Club, í úrslitum TGL-deildarinnar.

Ekki var um neina draumaendurkomu hjá Tiger að ræða því lið hans steinlá fyrir Los Angeles Golf Club, 9-2.

Eftir leikinn útilokaði Tiger ekki að taka þátt á Masters sem fer fram 9.-12. apríl næstkomandi. Eftir nýjustu tíðindi af hinum fimmtuga Tiger verður þó að teljast ólíklegt að hann verði með á þessu fyrst risamóti ársins.

Síðasti sigur Tigers á risamóti, og sá eini eftir atburðina örlagaríku 2009, var á Masters 2019.