Bakkavararbróðir kaupir í Kviku fyrir milljarða

Samkvæmt flöggun Kviku til Kauphallar keypti félagið Frigus ehf. alls 142.927.142 hluta í bankanum þann 8. maí síðastliðinn. Félagið ráði nú beint yfir 3,3 prósentum atkvæða í félaginu.

Þá hafi félagið aflað sér alls níu framvirkra samninga með uppgjörsdaga á tímabilinu 13. maí til 8. júní næstkomandi. Fjöldi atkvæða sem afla megi ef fjármálagerningarnir eru nýttir sé alls 76.941.884, eða 1,78 prósent atkvæða í félaginu. Þannig ráði félagið með beinum hætti og í gegnum framvirka samninga yfir 5,08 prósent atkvæða. Það gerir félagið að næststærsta einkafjárfestinum í bankanum á eftir Stoðum. hf., sem fara með 5,43 prósenta eignarhlut, samkvæmt nýjasta yfirliti yfir stærstu hluthafa bankans.

Frigus Invest ehf. er í 100 prósenta eigu Umbriel Ventures Ltd., sem skráð er á Kýpur, sem aftur er í 100 prósent eigu sjóðsins L.G. Trust, sem skráður er í Sviss, og er í þágu Lýðs, sem telst rétthafi sjóðsins.