Kosningastreita og stemning á vinnu­stöðum

Það skemmtilega við stress er nefnilega það að ekki er öll tegund streitu neikvæð. Ein tegundin kallast á ensku eustress, en það er jákvæð streita sem hvetur okkur áfram, gefur orku og fókus og hjálpar okkur oft til að standa okkur vel. Margir upplifa þessa tegund af streitu þegar það er einhver sérstök törn í gangi í vinnunni.

Eða kosningar.

Það eru hins vegar hinar tegundirnar af streitu sem eru ekki eins vænlegar. Sér í lagi þær tegundir sem verða langvarandi, eru endurteknar eða skella á okkur eins og stór alda eða áfall.

Á vinnustöðum þessa vikuna má ætla að þrennt sé ríkjandi:

Jákvæð spenna eða jákvæð streita. Fréttastofur elska til dæmis þennan tíma; eru á útopnu að undirbúa skemmtilega og fjölbreytta dagskrá fyrir komandi kjördag og kvöld.

Hið sama er eflaust upp á teningnum hjá mörgum kosningaskrifstofum. Sem hringja út eins og enginn verði morgundagurinn og selja atkvæði af meiri ástríðu en nokkru sinni fyrr.

Á sumum stöðum er eflaust rólegra yfirbragð. Svona „þetta skiptir ekki máli“ andrúmsloft; kosningarnar ná einfaldlega ekki að vekja upp nægilega mikla ástríðu eða áhuga til að breyta nokkru. Meira er verið að tala um veðrið eða hvort það náist að grilla um helgina. Að gera vel við sig í mat og drykk gæti reyndar verið ljúf tilhlökkun og óbein tenging við kosningar.

Það þriðja sem gæti átt við er hins vegar kvíði eða einhvers konar skammtímastreita. Sem þarf ekkert endilega að tengjast kosningunum beint, heldur frekar því hvernig fólk upplifir andrúmsloftið í kringum sig; þegar allir aðrir eru svona uppteknir af því að tala um kosningar og önnur hver frétt í fjölmiðlum snýst um kosningarnar.

Hjá sumum getur þetta stigmagnandi andrúmsloft valdið ákveðnum streituviðbrögðum sem fólki líður ekki vel með. Jafnvel þeim, sem þó upplifa sig í jákvæðu streitunni eða stemningunni.

Í ágætri grein á Very Well Mind er fjallað ítarlega um ólík afbrigði streitu, helstu einkenni og afleiðingar.

Þar eru líka ágætis góð ráð sem sumir gætu nýtt sér einmitt þessa síðustu daga fyrir kosningar. Þessi ráð eru til dæmis:

Staldraðu við og andaðu. Því djúp öndun róar taugakerfið strax.

Að róa okkur með því að setja hlutina í samhengi og spyrja: Hvers vegna er ég svo sem að stressa mig? Því oft fer heilinn einfaldlega í „allt er að fara til fjandans“ ham, án þess að nokkur ástæða sé til.

Að vera vakandi fyrir því að orkan okkar fari ekki í hluti eða aðstæður sem við höfum enga stjórn á. Reyna frekar að setja fókusinn okkar á það sem að okkur snýr og við getum stjórnað.

Göngutúr, hreyfing, að standa upp eða teygja aðeins úr okkur getur róað og slökkt á spennu. Stutt hlé hjálpa oft.

Að tala rólega við okkur sjálf. Vera vakandi fyrir því hvað innri röddin okkar er að segja og passa að hún tali fallega til okkar.

Muna að innri ró er færni en ekki eðli. Því oftar sem við æfum okkur í ró, því auðveldara verður að sækja hana.