Sýna puttann til stuðnings Kane

Kane hefur verið duglegur við að stela fyrirsögnunum á þeim þremur leiktíðum sem hann hefur spilað hér á landi.

Hann hélt því áfram eftir sigur Grindavíkur gegn Tindastóli á Sauðárkróki á þriðjudagskvöld þegar hann sendi stuðningsmönnum Tindastóls, sem eflaust hafa sent honum pillur, ítrekað fokkjúmerki með áberandi hætti í fagnaðarlátunum.

Fokkjúputtinn er áfram á lofti í Grindavík í kvöld því stuðningsmenn Grindavíkur eru með hann framan á gulum bolum sem þeir klæðast. Aftan á bolnum stendur „King Kane“.

Mál Kane fór inn á borð aga- og úrskurðarnefndar KKÍ og slapp hann við leikbann en hlaut 80.000 króna sekt.

Kane er því mættur til leiks í HS Orku-höllinni í kvöld og gekk þar glaðbeittur inn um dyrnar, fyrir leik sem gæti orðið sá síðasti á leiktíðinni. Grindavík er 2-0 yfir í einvíginu og gæti því orðið Íslandsmeistari í fyrsta sinn frá árinu 2013, og í fjórða sinn í sögunni.

Leikurinn í kvöld er í beinni útsendingu á Sýn Sport Ísland og beina textalýsingu Vísis má finna hér.