„Vissi ekki að þetta væri svona al­var­legt“

Yfirvöld í Pittsburgh segja að þessi bráðum 37 ára leikmaður Íslandsmeistaranna skuldi 100.000 Bandaríkjadali í meðlagsgreiðslur, eða um það bil 12,3 milljónir króna. Hann hafi verið á flótta frá árinu 2023 þegar hann mætti ekki fyrir dóm vegna málsins.

Ljóst er að Kane hefur þó ferðast ítrekað til Pittsburgh frá Íslandi síðan hann kom fyrst til Grindavíkur árið 2023, í jóla- og sumarfríum og jafnvel í landsleikjahléum.

Óli Björn segist ekki vita hvers vegna það var akkúrat núna sem Kane var handtekinn við lendingu á alþjóðaflugvellinum í Pittsburgh, og tíðindin komu honum talsvert á óvart eftir að hafa síðast fundað með Kane á föstudaginn og gengið endanlega frá því að Bandaríkjamaðurinn yrði aftur með Grindavík á næstu leiktíð.

Hafi fengið að vita af syninum sjö árum eftir fæðingu

Kane hefur aldrei farið leynt með það gagnvart vinnuveitendum sínum í Grindavík að hann skuldaði meðlag en Óli Björn sagðist hafa talið að lausn hefði fundist á því máli.

„Hann á þrjú börn þarna úti, tvö með núverandi konunni sinni og svo þennan dreng sem þetta mál snýst um. Mér skilst að hann sé 11-12 ára gamall í dag og Kane fékk ekki að vita af honum fyrr en strákurinn var orðinn sjö ára gamall, þegar mamma hans kemur og segir honum að hann eigi þennan dreng. Hann er þá dæmdur til að borga barnameðlag sjö ár aftur í tímann og þannig er þessi skuld tilkomin.

Hann hefur talað um þetta við okkur og ekkert farið í grafgötur með að hann skuldaði barnameðlag úti, og ég hélt að þetta væri bara í einhverju ferli. Að hann hefði samið um einhverjar mánaðarlegar greiðslur eða slíkt. En það er greinilega ekki þannig. Það kemur mér því jú svolítið á óvart að hann hafi hreinlega verið tekinn fastur karlgreyið þegar hann kom þarna út,“ segir Óli Björn.

Óli Björn segir einnig koma á óvart að málið endi með handtöku núna því að Kane hafi til að mynda í fyrsta sinn fengið að hafa drenginn hjá sér um síðustu jól og sé í góðu sambandi við hann.

Engar áhyggjur af að málið haldi Kane frá Íslandi

Aðspurður kveðst Óli Björn ekki hafa áhyggjur af því að málið hafi áhrif á þátttöku Kane með Grindavík á næstu leiktíð.

„Ég á ekki von á því. Þetta er eitthvað sem verður leyst þarna úti. Ég hef engar áhyggjur af því að hann sé að fara í steininn næstu árin eða neitt svoleiðis.

Honum verður sleppt eftir 72 tíma í síðasta lagi og svo fer þetta bara í eitthvað ferli. En þetta er, að því er mér skilst, ekki eitthvað sem gæti bannað honum að koma aftur til Íslands að spila körfubolta, því hann er að ferðast um á ungversku vegabréfi, ekki bandarísku. Hann er ungverskur ríkisborgari og það er ástæðan fyrir því að hann spilar með okkur,“ segir Óli Björn.