Martin ná­lægt tvennunni en Alba Berlin tapaði fyrsta leiknum

Alba Berlín varð að sætta sig við tap í fyrsta úrslitaleiknum á móti Bayern München í lokaúrslitunum um þýska meistaratitilinn í körfubolta.

Bayern vann leikinn með átta stigum, 102-94. Martin var með 14 stig og 9 stoðsendingar á aðeins 25 mínútum spiluðum í leiknum en hann var þriðji stigahæstur í sínu liði og stoðsendingahæstur á vellinum.

Leikurinn var lengstum æsispennandi, jafnt var eftir fyrsta leikhluta og Bayern var þremur stigum yfir í hálfleik, 58-55.

Alba vann fyrstu mínútur seinni hálfleiks 15-5 og komst sjö stigum yfir en Bæjarar voru komnir aftur yfir fyrir lokaleikhlutann.

Bayern var síðan sterkara liðið í fjórða leikhlutanum og vann hann með fimm stigum, 23-18.

Næsti leikur er líka á heimavelli Bayern en það lið sem fyrr vinnur þrjá leiki verður þýskur meistari. Leikir þrjú og fjögur verða spilaðir á heimavelli Alba í Berlín.