Hlutu Vigdísar­verð­launin fyrir bar­áttu fyrir jöfnu að­gengi að þungunar­rofi

Í tilkynningu á vef dómsmálaráðuneytis og utanríkisráðuneytis segir að verðlaununum fylgi 60 þúsund evrur í verðlaunafé og verðlaunagripurinn Kvika, listaverk eftir Brynhildi Þorgeirsdóttur sem sé unnið úr íslensku hrauni og gleri.

„Vigdísarverðlaunin minna okkur á að framfarir í jafnréttismálum verða ekki af sjálfu sér. Þær byggja á hugrekki, hugsjón og fólki sem er tilbúið að ryðja brautina fyrir aðra. Með verðlaununum veitum við mikilvægu starfi alþjóðlega athygli og hvetjum fleiri til að leggja sitt af mörkum í jafnréttisbaráttunni,“ er haft eftir Þorbjörgu S. Gunnlaugsdóttur dómsmálaráðherra.

„My Voice, My Choice er grasrótarhreyfing frá Slóveníu sem berst fyrir yfirráðarétt kvenna yfir líkama sínum og jöfnu aðgengi að þungunarrofi. Samtökin hafa haft töluverð áhrif á framvindu mála í Evrópuþinginu og hafa þegar safnað 1,2 milljónum undirskrifta.

Verðlaunin eru samstarfsverkefni Evrópuráðsþingsins og ríkisstjórnar Íslands. Þeim er ætlað er að vekja athygli á einstaklingum, stofnunum eða samtökum sem hafa stuðlað að valdeflingu kvenna með framúrskarandi hætti. Horft er meðal annars til verkefna sem stuðla að jafnrétti kynjanna, jafnari samfélagslegri þátttöku kvenna eða sem vekja athygli á ójafnri stöðu kvenna og hvetja til úrbóta.

300 umsóknir bárust

Valnefndinni bárust alls 300 umsóknir til valnefndar verðlaunanna og uppfylltu 100 þeirra skilyrði verðlaunanna. Auk My Voice, My Choice voru tvö önnur verkefni tilnefnd. Annar vegar nepölsku samtökin SASANE sem eru starfrækt af þolendum mansals og kynferðisofbeldis. Samtökin þjálfa konur sem hafa orðið fyrir ofbeldi í lögfræðitengdum málum og hafa komið að 1.500 lögsóknum og bjargað 238 konum og stúlkum.

Og hins vegar Girl Child Counselling Women Group sem eru samtök frá Kenía. Þau styðja við börn, stúlkur og ungar mæður, sem eru með HIV/AIDS og búa við sára fátækt, til að koma í veg fyrir mansal og kynlífsþrælkun.

Þetta er í þriðja sinn sem verðlaunin eru veitt. Þau voru fyrst afhent árið 2024 til grísku grasrótarsamtakanna Irida Women‘s Center sem hlutu þau fyrir starf sitt gegn fátækt, félagslegri einangrun og kynbundnu ofbeldi. Í fyrra hlutu palestínsku samtökin Women of the Sun verðlaunin fyrir að stuðla að valdeflingu palestínskra kvenna,“ segir í tilkynningunni.