Loka Te og kaffi á Suður­lands­braut

Tveir fastráðnir starfsmenn eru á kaffihúsinu sem halda sinni vinnu og hlutastarfsfólk heldur áfram að flakka á milli kaffihúsa eins og það hefur gert hingað til. Guðmundur segir aðrar breytingar ekki fyrirhugaðar hjá fyrirtækinu. Hinir sjö staðirnir verði áfram opnir og reksturinn gangi vel þar.

„Veitingarekstur er krefjandi í eðli sínu en hinir staðirnir ganga vel og við höfum fullan hug á því að halda áfram þar og gera enn betur,“ segir Guðmundur en að reksturinn á Suðurlandsbraut hafi verið með öðrum hætti þau tíu ár sem þau hafa verið þar.

„Við höfum aldrei náð upp þeirri veltu þarna sem við hefðum þurft til að láta hlutina ganga, því miður.“

Mikið hefur verið rætt um rekstur fyrirtækja á Suðurlandsbraut í tengslum við skipulagsbreytingar sem á að gera á götunni. Guðmundur tekur þó fram að ákvörðun þeirra um að loka sé alls ekki tengd þeim. Ákvörðunin hafi legið fyrir í nokkurn tíma.

Halda enn áfram annars staðar

„Við höfum verið að bíða af okkur þennan leigusamning,“ segir hann og að þeir sjö staðir sem eftir eru verði enn opnir og verði áfram reknir af sömu ástríðu.

„Það eru allir velkomnir sem vilja heimsækja okkur þangað.“

Sigmundur Dýrfjörð og Berglind Guðbrandsdóttir stofnuðu Te og kaffi árið 1984. Fyrsta verslun þeirra var í kjallara við Barónsstíg í Reykjavík en flutti síðar í húsnæði við Laugaveg þar sem þau ráku bæði verslun og kaffihús. Fyrirtækið stofnaði kaffibrennslu í Hafnarfirði árið 1987. Kaffihús fyrirtækisins voru 14 talsins árið 2017 en verða sjö eftir lokun á Suðurlandsbraut.