Öku­menn léku sér með Lego fyrir breska kapp­aksturinn

Breski kappaksturinn fer fram í dag og ríkir mikil spenna yfir honum. Ökumenn voru þó léttir í lund fyrir kappaksturinn þar sem þeir fengu að spreyta sig á litlum bílum byggðum úr Lego-kubbum.

Þetta voru ekki kraftmiklir bílar og vildu einhverjir ökumenn stytta sér leið í gegnum mölina á brautinni en þar festust bílarnir.

Breska hlaupagoðsögnin Mo Farah var á brautinni og var að hlaupa í kringum Lego-bílana. Ökumennirnir virtust njóta þess að fá að leika sér saman og fíflast.

Carlos Sainz, ökumaður Williams, losaði sig við sína bifreið og hoppaði á bíl síns gamla liðsfélaga, Lando Norris.

Breski kappaksturinn hefst klukkan tvö og er sýndur í beinni útsendingu á Sýn sport Viaplay.