Í upp­á­halds kjólnum við sólseturs-bónorðið

Blaðamaður ræddi við Sigurbjörgu Birtu um tískuna.

Hvað finnst þér skemmtilegast við tískuna?

Það sem heillar mig mest við tískuna er að hún hefur engar raunverulegar reglur. Hún er leið til að tjá persónuleikann og segja sögu án þess að segja nokkuð. Tveir einstaklingar geta klæðst sömu flíkinni og samt látið hana líta gjörólíkt út. Mér finnst það vera galdurinn við tísku.

Hver er uppáhalds flíkin þín og af hverju?

Það er appelsínugulur kjóll sem ég fann í vintage verslun fyrr á árinu. Þegar ég fann hann hugsaði ég að hann væri fullkomin til að taka með mér til Flórída. 

Kvöldið sem ég ákvað að klæðast kjólnum fór Gissur Karl unnusti minn á skeljarnar og bað mín við sólsetrið á ströndinni í Flórída. Kjólinn var fullkomin fyrir þetta móment og alveg í stíl við umhverfið.

Eyðirðu miklum tíma í að velja föt hverju sinni?

Það fer algjörlega eftir deginum. Ef ég veit að ég er að fara eitthvað sérstakt reyni ég yfirleitt að plana outfittið kvöldið áður, en oft verða líka bestu samsetningarnar til þegar ég hef aðeins nokkrar mínútur og þarf einfaldlega að treysta innsæinu.

Hvernig myndirðu lýsa stílnum þínum?

Ég myndi segja að stílinn minn einkennist af vintage flíkum í bland við nýjar flíkur. Ég elska að blanda gömlum og nýjum flíkum saman. Þegar ég finn flík sem ég elska nota ég hana aftur og aftur en reyni alltaf að stíla hana á nýjan hátt. 

Ég trúi því að aukahlutirnir séu oft það sem gerir klæðaburð eftirminnilegan, hvort sem það áberandi skart, litrík taska eða skór sem fá fólk til að snúa sér við.

Hefur stíllinn þinn breyst mikið í gegnum tíðina og hvernig þá?

Algjörlega. Ég held samt að grunnurinn hafi alltaf verið sá sami. Ég hef alltaf laðast að vintage flíkum, góðum sniðum og aðeins öðruvísi flíkum. 

Munurinn í dag er að ég hef miklu meira sjálfstraust og þori frekar að klæðast því sem mér finnst skemmtilegt án þess að velta fyrir mér hvað öðrum finnst.

Nýturðu þess að klæða þig upp?

Já, mér finnst það mjög gaman, sérstaklega ef ég er að fara eitthvað fínt og get verið í aðeins ýktari fötum en ég er í dagsdaglega. Ég vil frekar vera örlítið of mikið en aðeins of lítið.

Hvað skiptir þig mestu máli í klæðaburði?

Að mér líði vel. Föt eiga að undirstrika mann sjálfan. Þegar mér líður vel í því sem ég er í þá sést það líka. Þegar ég finn það jafnvægi verður dagurinn yfirleitt betri og sérstaklega ef hárið mitt er líka flott.

Hvaðan sækirðu innblástur í tískunni?

Ég sæki mikinn innblástur frá fólkinu í kringum mig til dæmis frá mömmu og systrum mínum. Svo vinn ég með algjörum tískuskvísum en ég fæ líka mikinn innblástur frá samfélagsmiðlunum Instagram og Pinterest.

Ertu með einhver boð og bönn þegar það kemur að klæðaburði?

Nei í rauninni ekki, mér finnst að tíska ekki eiga að snúast um reglur heldur um forvitni og leikgleði. Ef einhverjum líður vel í því sem hann er í þá er það alltaf rétt val. 

Ég held þú myndir samt ekki sjá mig í þröngum pleðurbuxum.

Áttu eitthvað eftirminnilegt tískuslys?

Alveg pottþétt en ekkert sem ég man sérstaklega eftir núna. Þegar ég sé gamlar myndir af mér þá hugsa ég alveg hvað var ég að spá með þessu outfitti en maður var svo sem að fylgja tískunni sem var í gangi á þeim tíma.

Spilar álit annarra eitthvað hlutverk í þínu fatavali?

Þegar ég var yngri hafði það meiri áhrif á mig. Í dag klæði ég mig fyrst og fremst fyrir sjálfa mig. Mér finnst miklu skemmtilegra að vera í því sem mér þykir fallegt en að reyna að klæða mig fyrir væntingar annarra.

Hver er eftirminnilegasta flík sem þú hefur klæðst og af hverju?

Örugglega coral litaði cargo jakkinn minn úr Spúútnik. Ég hef átt hann í nokkur ár en nýlega fór ég aftur að nota hann og mundi hvað litir gefa manni mikla orku. Ég fékk líka ótrúlega mörg hrós fyrir hann og það minnti mig á hversu gaman það er að þora að klæðast áberandi litum.

Hvað finnst þér heitast fyrir sumarið?

Mér finnst tískan í ár einkennast af litadýrð. Litríkar flíkur eru að trenda, fjölbreyttar skemmtilegar lita pallettur og fólk þorir að leika sér meira með stílinn sinn. Capri buxur eru komnar aftur hvort sem þær eru úr gallaefni, cargo eða í sportútgáfum.

Víðar buxur og blöðrubuxur eru vinsælar. Alls konar hælaskór eru mikið í tísku núna hvort sem það eru opnir eða lokaðir hælar, fylltir hælir og sérstaklega flip flop sandalar eða hælar. Það skemmtilega við að vinna í Spúútnik er að maður sér oft trendin áður en þau rata í hefðbundnar verslanir. 

Ég segi stundum að second hand markaðurinn sé eins konar kristalskúla tískunnar. Það sem fólk byrjar að leita að og finnur hjá okkur endar oft í almennum verslunum nokkrum mánuðum síðar.

Býrðu yfir einhverju góðu ráði þegar það kemur að tísku?

Ég trúi á gæði fram yfir magn. Það borgar sig að fjárfesta í færri flíkum sem endast lengi og hægt er að stíla á mismunandi vegu.

Gullna reglan mín er að ég kaupi aldrei flík nema ég sjái strax fyrir mér að minnsta kosti þrjú ólík „outfit“ með flíkinni.

Síðan finnst mér alltaf gaman að bæta við í fataskápinn einhverju einstöku eins og vintage flíkum, litríkum skóm eða áberandi skarti. Oft þarf bara eitt smáatriði til að gera heildarútlitið eftirminnilegt. Besti fataskápurinn er ekki endilega sá stærsti heldur frekar sá persónulegasti.