Sonur þing­manns grunaður um að hafa banað föður sínum

Lilja Rafney, sem er sjöundi þingmaður Norðvesturkjördæmis og formaður atvinnuveganefndar, greindi frá því á Facebook sama dag og andlátið bar að að eiginmaður hennar, Hilmar Oddur Gunnarsson, vörubifreiðastjóri og sjómaður frá Suðureyri, hefði látist 72 ára að aldri. Hann hefði glímt við veikindi síðustu árin eftir hjartaáfall og heilablóðfall.

Lögreglan er nú með til rannsóknar hvort sonur þeirra hafi orðið honum að bana, á heimili fjölskyldunnar í Salahverfi í Kópavogi. Samkvæmt heimildum fréttastofu hefur umræddur sonur, sem er á fimmtugsaldri, átt við andleg veikindi að stríða, til lengri tíma.

Greint frá málinu rúmri viku seinna

Fyrst var greint frá málinu þann 5. ágúst síðastliðinn og kom þá fram að umrætt andlát hefði borið að um helgina 25. og 26. júlí en Hilmar Oddur lést sunnudaginn 26. júlí.

Hinn grunaði var handtekinn þriðjudaginn 28. júlí og úrskurðaður í vikulangt gæsluvarðhald degi seinna á grundvelli rannsóknarhagsmuna. Þegar það varðhald rann út var hann á úrskurðaður í fjögurra vikna gæsluvarðhald á grundvelli almannahagsmuna,grunaður um að hafa orðið föður sínum að bana.

Ekki tímabært að greina frá notkun vopns

Samkvæmt heimildum fréttastofu fannst ekkert vopn á vettvangi. Að sögn E. Agnesar Eide Kristjánsdóttur, yfirlögregluþjóns miðlægrar rannsóknardeildar Lögreglunnar á höfuðborgarsvæðinu, er ekki tímabært að svo stöddu að greina frá því hvort til rannsóknar sé hvort vopni hafi verið beitt.

Þá segir hún að hinn grunaði sé yfirheyrður reglulega en lögregla telji sig vera komna með skýra mynd á atvik málsins.