Í fyrsta sinn í úr­slit á stór­móti: „Bomba á það og hafa gaman“

Það var síðasta kast Sindra Hrafns af þremur sem að kom honum inn í úr­slit greinarinnar á EM. Kastið var upp á 79,21 metra. Var það um­tals­vert lengra en fyrsta kast hans upp á 77,49 metra en í öðru kasti sínu átti Sindri eftir að gera ógilt.

Sindri endaði í áttunda sæti síns kastriðils og þurfti því að bíða eftir úr­slitunum úr seinni kast­hópnum til þess að fá úr því skorið hvort hann kæmist áfram í úr­slitin eða ekki. Tólf efstu kastararnir kæmust áfram.

Aðeins þrír spjót­kastarar úr seinni kast­hópnum köstuðu lengra en Sindri og því fór hann áfram með ellefta besta árangurinn. Þetta er í fyrsta sinn sem hann tryggir sig inn í úr­slit á stór­móti.

„Það var allt sett í síðasta kastið,“ segir Sindri Hrafn í samtali við íþróttadeild Sýnar. „Það var ekkert annað í boði. Ég þurfti að kasta lengra til að eiga mögu­leika á því að komast áfram og ég gerði það. Það var geggjuð til­finning sem fylgdi þessu. Ég var ekkert svo sáttur eftir fyrri kast­hópinn þar sem ég var áttundi og vissi að það færu tólf áfram í úr­slit. Maður var skeptískur um að komast áfram en svo horfði maður á seinni hópinn og hægt og ró­lega, einn á eftir öðrum, tókst þeim ekki að taka fram úr mér.

Geggjað að komast í fyrsta sinn í úr­slit á full­orðinsmóti. Ég hef farið í úr­slit á nokkrum ung­linga­mótum en það er allt annar pakki. Ég er spenntur fyrir því að kasta í úr­slitum á laugar­daginn.“

Stressið fór hægt og rólega

Þó var biðin eftir því að sjá hvort hann kæmist áfram í úr­slitin, með því að horfa á spjót­kastarana í seinni hópnum reyna slá hann út, stressandi.

„ Stressið fór hægt og ró­lega í síðustu um­ferðinni. Þá tók maður eftir því að það voru fjórir eftir og það máttu ekki þrír fara fram úr mér. Þegar það var komið í gegn var þetta ekkert nema hamingja og gleði. Ekki bara fyrir sjálfan mig heldur einnig konuna mina og fjöl­skyldu mina. Konan mín hefur staðið þétt við bakið á mér í þessu síðan að við kynntumst, það eru tíu ár síðan. Það er bara hrika­lega gaman að sjá þetta raun­gerast. Ekki bara fyrir sjálfan mig heldur líka þá sem hafa stutt við bakið á mér.“

Á meira inni

Úr­slit spjót­kastsins, þar sem að Sindri mætir aftur á stóra sviðið, fara fram á laugar­daginn kemur og er persónu­legt met Sindra í greininni upp á 82,55 metra.

Finnst þér þú eiga meira inni?

„Já al­gjör­lega. Köstin í undanúr­slitunum fóru ágæt­lega vega­lengdir en mér fannst tækni­lega séð og kraft­lega séð að þetta hafi ekki verið eins gott og ég hef gert áður. Ég veit að ég á fullt inni. Vonandi getur maður sýnt það á laugar­daginn. Maður fer inn í þessi úr­slit með það að leiðar­ljósi að skemmta sér og kasta langt. Reyna komast í topp átta. Bomba á það og hafa gaman. Ég hef ætlað mér að komast í topp átta. Það er alveg klárt mál. Smá pressa en ekkert al­var­legt. Við erum að kasta spjóti. Þetta á bara að vera gaman.“

Ísland á réttri leið

Sindri er þriðji Ís­lendingurinn sem keppir til úr­slita á yfir­standandi Evrópumóti en fyrir höfðu sleggju­kastararnir Hilmar Örn og Guðrún Karítast keppt til úr­slita. Hilmar náði besta árangri Ís­lendings á Evrópumóti í frjálsum íþróttum í 24 ár með því að enda í sjöunda sæti.

Þor­kell Gunnar Sigur­björns­son, íþrótta­frétta­maður RÚV, benti á það í grein að Ís­land hafi ekki átt svo marga kepp­endur í tólf efstu í sínum greinum á EM í 28 ár.

„Það er frábært að sjá Hilmar og Guðrúnu komast í úr­slit í sínum greinum. Það hjálpar bara og sýnir manni að allt getur gerst. Við erum mjög mörg búin að vera ferðast saman í lands­liðs­ferðum yfir lengri tíma. Við Hilmar höfum farið margar ferðir á mót saman síðan árið 2014 og Guðni Valur líka. Frábært að sjá þennan árangur núna. Sýnir að Ís­land er á réttri leið. Geðveikt að vera partur af því.“