Vesen hjá Palace: Mateta heldur því fram að lokaár samningsins sé ó­gilt

Sambandsdeildarmeistarar Palace töpuðu 2-0 fyrir Everton á útivelli í 1. umferð ensku úrvalsdeildarinnar í dag.

Mateta var í byrjunarliði Palace í dag en franski landsliðsmaðurinn virðist ekki vera of spenntur fyrir því að vera áfram í herbúðum Lundúnaliðsins.

BBC greinir frá því að Mateta haldi því fram að síðustu tíu mánuðir samnings hans við Palace séu ógildir.

Mateta kom upphaflega til Palace á láni frá Mainz 05 í janúar 2021. Félagið keypti hann ári seinna. Þá skrifaði Mateta undir fjögurra og hálfs árs samning við Palace með möguleika á árs framlengingu.

Það ákvæði var virkjað 2024 og því á samningur Matetas að renna út eftir þetta tímabil.

Hann heldur því hins vegar fram að þetta síðasta ár sé ógilt. Talið er að málið hafi verið tekið fyrir af óháðum gerðardómi samkvæmt reglum ensku úrvalsdeildarinnar.

Sá ku hafa úrskurðað að samningur Matetas sé bindandi, án þess að það hafi verið staðfest, en hann á þá að hafa leitað til FIFA. Svar Alþjóða knattspyrnusambandsins hafi verið á þá leið að það væri ekki innan lögsögu þess að ógilda samninginn.

Mateta hefur ekki farið leynt með áhuga sinn á að reyna fyrir sér hjá stærra félagi. Í janúar var hann nálægt því að ganga í raðir AC Milan en meiðsli komu í veg fyrir þau félagaskipti.

Hinn 29 ára Mateta hefur skorað 62 mörk í 202 leikjum fyrir Palace. Hann vann ensku bikarkeppnina með liðinu 2025 og Sambandsdeildina í vor.