„Ef þetta hefði verið ég þá hefði ég hætt keppni“

Annie Mist mætti í Reykjavík síðdegis í dag til þess að ræða atvik Joönna Wietrzyk sem hefur verið mikið á milli tannanna á fólki síðustu daga.

„Það er ekki mjög algengt að þetta gerist þegar þú ert að keppa. Það hefur margoft gerst hjá konum að þær missi kannski þvag. En þetta kemur fyrir,“ sagði Annie Mist og sagðist oft hafa verið í mikilli áreynslu en aldrei lent í jafn slæmu ástandi og Joanna Woetrzyk.

Hreinlæti skiptir miklu máli í keppnum sem íþróttafyrirtækið Hyrox stendur fyrir þar sem keppendur eru á stöðvum hver á fætur öðrum. Búið er að herða ýmsar reglur til að halda keppnissvæðinu í eins góðu ásigkomulagi og hægt er.

„Ef þú skirpir þegar þú ert að keppa fékkstu tveggja mínútna refsingu en ég held að núna sértu rekinn úr keppni. Þegar þú ert að keppa í Hyrox þá er einhver sem kemur beint á eftir þér, þú gerir burpees, ert að leggjast niður á gólfið og það er einhver sem kemur beint á eftir þér.

Það er ekki eins og það sé verið að skúra og þrífa á milli. Það er bara keppni í gangi í fleiri klukkutíma þar sem fólk rúllar í gegnum brautirnar,“ sagði Annie Mist og bætti við að ef það sama myndi gerast í maraþonhlaupi þá væri auðvelt að hlaupa fram hjá óþrifnaðinum.

Joanna Wietrzyk bætti heimsmetið í Hyrox fyrr á árinu þegar hún fór á 54 mínútum og 25 sekúndum og var því fyrsta konan til þess að fara undir 55 mínútur. Annie Mist hefur verið á toppnum í Crossfit og hefur lagt ýmislegt á sig en hún hefði ekki haldið áfram ef hún hefði kúkað á sig.

„Í fyrsta lagi er ömurlegt að þetta gerist, greyið stelpan. En ef þetta hefði verið ég þá hefði ég hætt keppni og farið til hliðar. Þetta mót skipti ekki öllu máli og hún þurfti ekki að vinna þetta mót.“

Fólk á hliðarlínunni átti að stíga inn í

Annie Mist tekur þó fram að ábyrgðin sé ekki bara hjá keppandanum heldur líka þjálfurum hennar og aðstandendum.

„Að sjálfsögðu hefðu þeir sem eru að halda mótið átt að taka hana úr keppni. Þetta er ekki bara ógeðslegt heldur getur þetta líka verið hættulegt. Fólk getur orðið fárveikt af þessu. Einhvers staðar þarf að draga mörkin og ég held að skipuleggjendur mótsins viti að þeir hafi gert mistök þarna.“

Annie Mist sagðist hafa brugðið þegar hún sá myndir af Wietrzyk og vorkennt henni. Samkenndin hafi þó minnkað þegar hún komst að því að hún hélt áfram keppni.

„Klárlega hefði hún átt að hætta, ég hefði mögulega litið öðruvísi á þetta ef þetta hefði verið heimsmeistaramót og heimsmeistaratitill undir.“

Viðtalið má sjá í heild sinni í spilaranum hér að ofan.