Celtic og Rangers á­frýja

Félögin hafa einnig áfrýjað 100.000 punda sekt sem þau fengu hvort um sig eftir óeirðir í kjölfar bikarleiks liðanna á Ibrox í 8-liða úrslitum síðasta tímabils. Celtic vann leikinn eftir vítaspyrnukeppni.

Áfrýjunarmálin verða tekin fyrir hjá skoska knattspyrnusambandinu mánudaginn 26. október.

Bæði félög voru jafnframt vöruð við því að þau gætu þurft að leika annan heimaleik án áhorfenda ef óásættanleg hegðun myndi endurtaka sig.

Lögreglan í Skotlandi handtók 43 einstaklinga eftir að stuðningsmenn liðanna lentu í átökum að leik loknum í mars. Lögreglumenn og öryggisverðir slösuðust í óeirðunum og hlutum og flugeldum var kastað.

Óháð úttekt sem skoska knattspyrnusambandið lét gera komst að þeirri niðurstöðu að raunveruleg og fyrirsjáanleg hætta hefði verið á troðningi vegna þess að stuðningsmenn úr svokölluðum Ultra-hópum fóru fram hjá lögreglu og öryggisvörðum í miklum fjölda.

Celtic gagnrýndi upphaflega refsinguna harðlega og sagði hana ósanngjarna í ljósi þess að stuðningsmenn félagsins hefðu aðeins farið inn á völlinn í kjölfar sigursins. Félagið benti jafnframt á að það hefði verið gestaliðið og bæri því ekki ábyrgð á öryggisráðstöfunum á Ibrox.