Chicharito með fimm mörkum fleira en allt United-liðið

Manchester United hafði ekki pláss fyrir hin mexíkóska Javier Hernández á þessu tímabili en menn þar á bæ sjá væntanlega svolítið eftir því í dag.

Javier Hernández, betur þekktur undir gælunafninu Chicharito, var lánaður til Real Madrid tímabilið á undan en í haust seldi United hann til þýska liðsins Bayer Leverkusen fyrir 7,3 milljónir punda.

Það hefur lítið gengið að skora hjá liði Manchester United að undanförnu og það vantar tilfinnanlega markaskorara eins og Javier Hernández í framlínu liðsins.

Stuðningsmenn Manchester United fara þó fyrst að sakna Chicharito þegar þeir sjá þá ótrúlegu tölfræði að litli markheppni framherjinn frá Mexíkó er búinn að skora fimm mörkum fleira en allt lið Manchester United frá og með 20. október síðastliðnum.

Chicharito er búinn að skora 15 mörk í síðustu 12 leikjum með Bayer Leverkusen í öllum keppnum.

Á sama tíma er allt Manchester United liðið búið að skora 10 mörk í 12 leikjum í öllum keppnum og mótherjarnir hafa þar af skorað tvö þeirra.

Chicharito hefur bara klikkað að skora í tveimur leikjum á þessu tímabili en Manchester United hefur fimm sinnum mistekist að skora.

Hér fyrir neðan má sjá þessa ótrúlegu tölfræði útlistaða hjá Javier Hernández með Bayer Leverkusen og öllu Manchester United liðinu.



Leikir og mörk Javier Hernández síðan 20. október:

20. október: 4-4 jafntefli við Roma - 2 mörk

24. október: 4-3 sigur á Stuttgart - 1 mark

28. október: 6-0 sigur á Viktoria Köln - 2 mörk

31. október: 1-2 tap fyrir Wolfsburg  - 1 mark

4. nóvember: 2-3 tap fyrir Roma - 1 mark

7. nóvember: 1-2 tap fyrir Köln - 1 mark

21. nóvember: 3-1 sigur á Frankfurt - 2 mörk

24. nóvember: 1-1 jafntefli við BATE Borisov - Skoraði ekki

29. nóvember: 1-1 jafntefli við Schalke 04 - Skoraði ekki

5. desember: 1-2 tap fyrir Hertha BSC - 1 mark

9. desember: 1-1 jafntefli við Barcelona - 1 mark

12. desember: 5-0 sigur á Gladbach - 3 mörk

Samtals: 15 mörk



Leikir Manchester United síðan 20. október

21. október: 1-1 jafntefli við CSKA Moskvu - 1 mark

25. október: 0-0 jafntefli við Manchester City - 0 mörk

28. október: 0-0 janftefli við Middlesbrough (1-3 tap í vítakeppni) - 0 mörk

31. októtber: 0-0 jafntefli við Crystal Palace - 0 mörk

3. nóvember: 1-0 sigur á CSKA Moskvu - 1 mark

7. nóvember: 2-0 sigur á West Bromwich - 2 mörk

21. nóvember: 2-1 sigur á Watford - 2 mörk (1 sjálfsmark)

25. nóvember: 0-0 jafntefli við PSV Eindhoven - 0 mörk

28. nóvember: 1-1 jafntefli við Leicester City - 1 mark

5. desember: 0-0 jafntefli við West Ham - 0 mörk

8. desember: 2-3 tap fyrir Wolfsburg - 2 mörk (1 sjálfsmark)

12. desember: 1-2 tap fyrir Bournemouth - 1 mark

Samtals: 10 mörk (2 sjálfsmörk)