Vaxtahækkanir að skila sér

Davíð Oddsson seðlabankastjóri segir að lækkun verðbólgunnar hafi engin áhrif á ákvörðun bankans um hækkun stýrivaxta sem búist er við í byrjun desember.

"Það er jákvætt að langtímaverðbólga skuli lækka en varasamt að horfa á einn mánuð og draga of miklar ályktanir. Það er jákvæð vísbending að olíuverð verði stöðugra og hækkun á íbúðaverði virðist ganga til baka. Þetta getur haft jákvæð áhrif á mælingu vísitölu yfir tólf mánaða tímabil," segir hann.

Davíð segir að áhrif vaxtahækkana Seðlabankans hafi skilað sér upp á síðkastið í hækkun á langtímavöxtum. Allt of snemmt sé að fjalla um með hvaða hætti tilkynning bankans í desember verði.