Svip­myndir úr Hörpu: Framúr­skarandi fyrir­tækjum fagnað

Athöfnin var afar vel sótt og var henni streymt í beinni útsendingu á Vísi. Tæplega 1.220 fyrirtæki komust á listann í ár, samanborið við 1.155 á síðasta ári. Vottunin er verðmæt viðurkenning fyrir fyrirtæki sem skara fram úr í íslensku atvinnulífi og getur bæði styrkt stöðu þeirra á markaði og aukið traust viðskiptavina og samstarfsaðila.

Hrefna Ösp Sigfinnsdóttir, framkvæmdastjóri Creditinfo á Íslandi, setti viðburðinn og óskaði fulltrúum fyrirtækjanna til hamingju með viðurkenninguna og góðan rekstrarárangur á árinu 2025. Í ræðu sinni lagði hún áherslu á mikilvægi öflugs atvinnulífs fyrir samfélagið og sagði viðurkenninguna bæði staðfestingu á góðum árangri og hvatningu til frekari uppbyggingar.

Hún undirstrikaði að kröfur Creditinfo væru strangar og aðeins um 2% íslenskra fyrirtækja kæmust á listann. Sérstaklega vakti hún athygli á þeim 46 fyrirtækjum sem hefðu verið á listanum í 17 ár samfleytt.

Fyrirtæki sem standa á traustum fótum, þau skapa svo mikið. Þau skapa okkur verðmæti, stöðugleika, fullt af tækifærum og þessi tækifæri eru fyrir svo marga.

Næstur steig á svið heiðursgestur dagsins, Bjarni Benediktsson, framkvæmdastjóri Samtaka atvinnulífsins. 

Í ræðu sinni lagði Bjarni áherslu á að framúrskarandi rekstur byggðist á aga, stöðugleika og góðum ákvörðunum til lengri tíma. Hann undirstrikaði mikilvægi öflugs atvinnulífs fyrir lífskjör þjóðarinnar og hvatti stjórnvöld til að sýna aðhald í opinberum fjármálum og forðast skattahækkanir. Þá minnti hann á að viðurkenningarnar væru ekki síður vitnisburður um framlag starfsfólks fyrirtækjanna.

Þetta kann að hljóma mjög hversdagslega en það er einmitt þannig sem að framúrskarandi fyrirtæki verða til, með því að gera margt vel aftur og aftur yfir langan tíma.

Að lokum afhenti Erla Ósk Ásgeirsdóttir, formaður stjórnar Festu – miðstöðvar um sjálfbærni, sérstök hvatningarverðlaun fyrir framúrskarandi framtak á sviði sjálfbærni. Í ár fékk Nói Síríus verðlaunin.

Í ræðu sinni lagði Erla Ósk áherslu á mikilvægi inngildingar á vinnumarkaði og hrósaði Nóa Síríusi fyrir að skapa varanleg störf fyrir fólk með frábrugðna starfsorku. Með aðlögun vinnustaðarins og markvissum stuðningi hefði fyrirtækið aukið starfsánægju, eflt samskipti og sýnt hvernig fjölbreytileiki getur orðið styrkleiki í vinnustaðamenningu.

Inngilding snýst ekki aðeins um að skapa fólki tækifæri. Hún snýst um að sjá tækifærin sem felast í fólkinu.

Sýnt var stutt myndband um starfsemi Nóa Síríusar. Í því kom m.a. fram að fyrirtækið hefði í yfir 40 ár haft fólk með frábrugðna starfsgetu í vinnu. Með samstarfi við Vinnumálastofnun og ráðningu inngildandi verkstjóra hefði fyrirtækið stigið skrefinu lengra, aðlagað verkferla og skapað raunveruleg störf. Þá væri fjölbreytileiki starfsfólks, sem kemur frá 14 þjóðlöndum, mikilvægur þáttur í fyrirtækjamenningunni.

Viðburðinum var streymt í beinni útsendingu á Vísi og má horfa á upptökuna í spilaranum hér fyrir neðan.

Mikil gleði og góð stemning ríkti í Hörpu þar sem fjöldi gesta kom saman til að fagna árangri framúrskarandi fyrirtækja. Veðrið lék við gesti sem nutu hátíðarinnar í Hörpu. Hér fyrir neðan má sjá myndir sem Anton Brink, ljósmyndari Vísis, tók við þetta tilefni.