Undirbúa dómsmál vegna kaupanna

Samtök fjárfesta í Danmörku undirbúa dómsmál gegn fyrrverandi stjórn verslanakeðjunnar Magasin du Nord þar sem þau telja að smærri hluthafar félagsins hafi verið hlunnfarnir þegar nokkrir Íslendingar undir forystu Baugs keyptu meirihluta keðjunnar. Danska dagblaðið Berlingske Tidende greinir frá því í dag að margir smærri hluthafar Magasín telja að fyrrverandi stjórn fyrirtækisins hafi brotið lög og haldið upplýsingum leyndum fyrir hluthöfum þegar hún ákvað að selja íslenska fyrirtækinu M-holding, sem er að stórum hlut í eigu Baugs, meirihlutann í verslanakeðjunni. Hluthafarnir fimmtán sem ætla í mál við stjórnina fyrrverandi segja að söluverð hvers hlutar hafi verið alltof lágt. Á aðalfundi Magasín í fyrradag var samþykkt að skylda eldri hluthafa til að selja Íslendingunum hlut sinn. Margir þeirra eru því hins vegar andsnúnir þar sem þeir telja að andvirði hvers hlutar sé að minnsta kosti tvisvar sinnum verðmeira en verðið sem á að skikka þá til að selja á. Þeir byggja það meðal annars á því að verulegur hagnaður hafi orðið af sölu Magasín á fasteignum fyrirtækisins við Kóngsins Nýtorg í Kaupmannahöfn, en að þeim upplýsingum hafi verið leynt fyrir hinum smærri hluthöfum. Sá hagnaður einn og sér eigi að auka andvirði hvers hlutar. Samtök fjárfesta, sem eru 13 þúsunda manna samtök hlutafjáreigenda, telja viðskipti fyrrverandi stjórnar og íslensku fjárfestanna ólögleg þar sem ekki hafi allir setið við sama borð. Samtökin bíða nú viðbragða allra smærri hluthafa Magasíns og reikna með að reka málið fyrir þeirra hönd fyrir dómstólum. Lögmaður íslensku fjárfestanna segir málið orðum aukið en formaður samtaka fjárfesta, Claus W. Silfverberg, er á öðru máli. Hann segist sannfærður um að málstaður hluthafanna sé góður og bætir við, í samtali við Berlingske Tidende, að það sé einfaldlega ekki hægt að ganga að hlutum fólks og stela þeim.