Æfingaleikir við Pólverja

Leikirnir við Pólverja eru liður í undirbúningi karlalandsliðsins fyrir umspilsleikina gegn Hvít-Rússum í sumar, þar sem leikið verður um sæti á EM í Sviss sem haldið verður í janúar á næsta ári. Viggó Sigurðsson telur Pólverjaleikina vera góðan undirbúning fyrir átökin við Rússana og segir sitt lið tilbúið í slaginn gegn pólska liðinu. Pólverjar eru nokkuð óþekkt stærð, því að liðið er komið með nýjan þjálfara sem stígur sín fyrstu spor með liðið hér á Íslandi um páskana. "Undirbúningurinn fyrir leikina hefur gengið mjög vel og við vorum að fá Dag Sigurðsson og Róbert Gunnarsson til landsins, þannig að hópurinn er að verða klár. Það er kannski ekki alveg sama alvaran í Pólverjaleikjunum hjá A-landsliðinu eins og hjá unglingalandsliðinu, en við gerum að sjálfsögðu kröfu um sigur í öllum þremur leikjunum. Við þurfum að laga hjá okkur varnarleikinn sem gekk illa upp í Túnis. Sóknarleikurinn hefur verið í þokkalegu lagi, svo að áherslupunkturinn í undirbúningnum hefur verið varnarleikurinn. Við höfum ekki náð að vera neitt mikið saman en við erum svona að slípa þetta saman og renna yfir þessi kerfi núna. Ég var að tala við sænska landsliðsþjálfarann í síma rétt áðan, en þeir lentu á móti Pólverjum í undankeppninni og hann tjáði mér að þeir hefðu ekki geta lent á móti erfiðara liði. Það sýnir okkur bara að pólska liðið er mjög vel mannað og sterkt. Þetta verða því erfiðir leikir og kærkomin æfing fyrir liðið," sagði Viggó