Eyða meiri peningum ytra

Íslendingar virðast vera að nýta sér sterka stöðu krónunnar til mikilla viðskipta erlendis ef marka má aukningu á krítarkortaviðskiptum landans í útlöndum. Í febrúar straujuðu Íslendingar fyrir 2,1 milljarð króna í útlöndum og er það um þriðjungi meira en á sama tíma í fyrra. Þá voru íslenskir farþegar um Keflavíkurflugvöll 36 prósentum fleiri í febrúar í ár en í sama mánuði í fyrra samkvæmt morgunkorni Íslandsbanka. Segir þar að allt þetta auki viðskiptahallann sem stefni í met á þessu ári, bæði í krónum talið og sem hlutfall af landsframleiðslu. Samkvæmt spá greiningardeildar Íslandsbanka er líklegt að það fari að grafa undan styrk krónunnar áður en árið 2007 rennur upp.