Staða bankanna sé traust

Seðlabankastjóri gefur ekki mikið fyrir niðurstöður norsks prófessors um að íslenska bankakerfið geti hrunið eins og spilaborg. Prófessorinn kannaði stöðu íslenskra banka fyrir norska fjármálaeftirlitið. Skýrslan er unnin af Thore Johnsen, prófessor við norska viðskiptaháskólann, þar sem hann skoðaði íslenska banka í kjölfar yfirtöku Íslandsbanka á BN banka í Noregi. Í skýrslunni varar prófessorinn við miklum vexti bankanna. Hann segir þá geta hrunið eins og spilaborgir ef harðnar á dalnum. Birgir Ísleifur Gunnarsson seðlabankastjóri er ekki sammála skýrsluhöfundi. Hann segir þetta gamla skýrslu sem dúkki allt í einu upp í fjölmiðlum nú en ýmislegt hafi gerst síðan hún var samin. Í fyrsta lagi hafi norska fjármálaeftirlitið og fjármálaráðuneytið þar í landi samþykkt kaup Íslandsbanka á BN bank en það hafi einmitt verið tilefni skýrslunnar. Í apríl kom út skýrsla um fjármál og stöðugleika á vegum Seðlabankans þar sem fram kemur að fjármálakerfið hér á landi sé traust. Birgir Ísleifur bendir á í þriðja lagi að Alþjóðagjaldeyrissjóðurinn hafi verið að skila í þessari viku greinargerð þar sem meðal annars hafi verið fjallað um íslenska banka og fjármálastofnanir. Niðurstaða hans sé að efnahagur þeirra sé traustur. Jafet Ólafsson, framkvæmdastjóri Verðbréfastofunnar, telur íslenska banka standa traustum fótum. Hann segir útrás þeirra nauðsynlega og gera viðskiptalífinu gott. Ef prófessorinn eigi við að íslenskir bankar eigi of mikið af hlutabréfum þá hafi það sýnt sig að í samanburði við erlenda banka eigi íslenku bankarnir lítið af hlutabréfum. Af eignum þeirra, sem séu upp á 340 milljarða, þá séu rétt um 15 prósent í hlutabréfum.