Gengið frá sölu Pennans

Gengið hefur verið frá samningum um sölu Pennans hf. til hóps fjárfesta undir forystu Kristins Vilbergssonar. Tekur Kristinn við starfi forstjóra Pennans í dag af Gunnari B. Dungal sem stjórnað hefur fyrirtækinu í 36 ár. Í tilkynningu frá Pennanum segir að Gunnar verði Kristni til ráðgjafar um sinn, en Penninn rekur tólf verslanir á höfuðborgarsvæðinu og á Akureyri auk þess sem verslanir undir nafni hans í eigu annarra eru á Akranesi, Selfossi, Ísafirði og í Vestmannaeyjum. Kaupverð fyrirtækisins er sagt trúnaðarmál.