Stofnfé sé eign allra Hafnfirðinga

Þótt ekki sé verið að stela frá neinum, er þetta siðlaust og ætti ekki að líðast. Þetta segir Helgi í Góu, einn stofnfjáreigenda í Sparisjóði Hafnarfjarðar, um þá sem hafa selt hluti sína í sjóðnum. Hann segir stofnféð vera eign allra Hafnfirðinga. Ekki er langt síðan Kaupþing banki sýndi áhuga á að kaupa stofnféð í Sparisjóði Reykjavíkur og nágrennis en komið var í veg fyrir kaupin með lagasetningu. Forstjóri bankans, Hreiðar Már Sigurðsson, segir bankann ekki tengjast á nokkurn hátt uppkaupum á stofnfé í Sparisjóði Hafnarfjarðar en samkvæmt heimildum Ríkisútvarpsins hafa 30 af 47 stofnfjáreigendum sparisjóðsins þegar selt hluti sína í sjóðnum fyrir mörg hundruðfalt nafnvirði eftir að nýr meirihluti komst til valda í stjórn sjóðsins nýverið. Hinir nýju stjórnendur vilja ekkert tjá sig um málið. Guðmundur Árni Stefánsson líkir málinu við rán um hábjartan dag og tekur Helgi Vilhjálmsson, kenndur við Góu, í sama streng. En er í raun verið að stela frá einhverjum og hlýtur einhver skaða af? Helgi segist telja að ekki sé verið að stela frá neinum en þetta sé siðlaust. Þarna séu 47 aðilar nefndir og af hverju eigi þeir að fá peninga, af hverju ekki alveg eins allir hinir sem ekki hafi fengið bréf? Þá eigi kúnnarnir þátt í því að bankinn sé til. Sérfræðingar, sem fréttastofa Stöðvar tvö hafði samband við, segja að án efa hafi hinir nýju stjórnendur sjóðsins áhuga á að gera bankann að söluvöru til stórra banka eða sjóða. Þeir segja að bönkum verði án efa leyfilegt í framtíðinni að eiga sparisjóði og fara þeir eflaust á hlutabréfamarkað áður en langt um líður. Þó hefur því verið fleygt að bankarnir vilji kannski styrkja einstaklingsþjónustuþátt sinn en þar hafa sparisjóðirnir sterkari stöðu og finnst mörgum sem persónulegheit bankanna séu löngu horfin. Margir segja hins vegar þær forsendur, sem voru fyrir sparisjóðum á sínum tíma, ekki lengur vera fyrir hendi. Þeir séu í raun úreltir og því sé eðlilegt að starfsemi þeirra breytist í takt við nýja tíma.