Ekkert stofnfé hafi verið selt

Stjórnarformaður Sparisjóðs Hafnarfjarðar, Páll Pálsson, segir að enginn stofnfjáreigandi hafi selt hlut sinn. Í yfirlýsingu sem hann sendi í gærkvöldi, fyrir hönd stjórnar sparisjóðsins, kemur fram að viðskipti með bréf séu háð samþykki stjórnar og að engin beiðni hafi borist stjórninni frá stofnfjáraðilum um að framselja bréf sín. Fréttastofa Bylgjunnar hringdi í Pál í morgun en hann hafnaði viðtali. Spurður um hvort stofnfjáreigendum hefði verið gert tilboð í bréf sín svaraði Páll að hann vissi ekki til þess. Í yfirlýsingu hans kemur fram að það sé vilji þeirra manna sem tóku við stjórn Sparisjóðs Hafnarfjarðar hinn 20. apríl síðastliðinn að fjölga stofnfjáraðilum. Til þess þurfi hins vegar 2/3 hluta atkvæða á aðalfundi en þann styrk hafi stjórnin ekki í stofnfjáraðilahópnum. Það hafi jafnframt verið afstaða hinnar nýju stjórnar að standa ekki í vegi fyrir því ef stofnfjáraðilar vildu framselja bréf sín. Berist slík beiðni verði hún að sjálfsögðu tekin fyrir og fullnægi hún skilyrðum laga muni sitjandi stjórn væntanlega taka hana til greina. Vakin er athygli á því að viðskipti með stofnfé í nokkrum öðrum sparisjóðum hafi verið fjörleg, til að mynda hafi meira en helmingur alls stofnfjár í SPRON skipt um eigendur á allra síðustu misserum. Segir Páll í yfirlýsingunni ekkert óeðlilegt við það að fjárfestar sýni bréfum í Sparisjóði Hafnarfjarðar áhuga. Stjórnin telji það af hinu góða ef öflugir fjárfestar hafi áhuga fyrir sparisjóðnum og séu reiðubúnir til að fjárfesta í stofnfé hans. Sparisjóðurinn þurfi á því að halda að nýir og öflugir einstaklingar komi að stjórn sjóðsins og rekstri.