Samningi Vieris rift

Ítalska knattspyrnuliðið Internazionale hefur rift samningi við framherjann Christian Vieri. Vieri átti ár eftir af samningi en það varð að samkomulagi milli leikmannsins og félagsins að leiðir myndu skilja. Vieri er sagður einn launahæsti leikmaðurinn í ítölsku deildinni en árslaun hans eru talin vera 12 milljónir evra eða 945 milljónir íslenskra króna. Ítalska dagblaðið Gazetta dello Sport segir að líklegt sé að Vieri fari til enska liðsins Tottenham Hotspur. Vieri, sem verður 32 ára í næsta mánuði, var keyptur til Inter árið 1999 en félagið borgaði þá 50 milljónir dollara, eða um 3,2 milljarða króna, miðað við gengi dollarans í dag.