Baugur síður en svo hættur

Baugur er síður en svo hættur að fjárfesta, þrátt fyrir ummæli forstjóra félagsins um að Baugur myndi taka sér hlé. Baugur keypti nýverið 30 prósenta hlut í danska fasteignafélaginu Keops og stefnir á að eignast 30-40 prósenta hlut í bresku tískuvöruverslanakeðjunni Jane Norman, en viðræður eru á lokastigi. Jón Ásgeir Jóhannesson, forstjóri Baugs, hefur sagt að Baugur myndi draga sig í hlé hvað fjárfestingar varðaði á næstunni vegna yfirvofandi dómsmáls á hendur honum og fimm öðrum. Þrátt fyrir þessi ummæli hefur Baugur keypt 30% hlut í danska fasteignafélaginu Keops fyrir um sex milljarða íslenskra króna. Að sögn danskra fjölmiðla hefur Baugur hug á að eignast stærri hlut í félaginu. Skarphéðinn Berg Steinarsson, framkvæmdastjóri Norrænna fjárfestinga Baugs, segir að Jón Ásgeir hafi aðeins átt við að Baugur myndi draga sig í hlé hvað varðaði fjárfestingar eins og Sommerfield-samningurinn gekk út á, eða yfirtöku. Skarphéðinn sagði Baug einungis vera að kaupa sig inn í skráð hlutafélag og að Baugsmenn myndu halda ótrauðir áfram í slíkum viðskiptum. Baugur myndi hins vegar taka sér frí frá því að taka fyrirtæki af markaði með skuldsettum yfirtökum, og það hafi Jón Ásgeir átt við. Þá sagði Skarphéðinn að Baugur hygðist auka fasteignakaup sín í Danmörku, á Bretlandi og á Íslandi á næstunni. Ástæðan væri einfaldlega að þrátt fyrir hátt fasteignaverð að undanförnu teldu þeir að það gæti enn hækkað. Og það er ýmislegt fleira í gangi, eins og viðræður Baugs um kaup á 30-40% hlut í bresku tískuvöruverslanakeðjunni Jane Norman sem eru á lokasprettinum, að því er kemur fram í breska blaðinu The Time. Kaupverðið er rúmar 100 milljónir punda, eða sem nemur um 11,4 milljörðum króna. Jane Norman rekur tæpar 100 verslanir víða um Bretland og því óhætt að segja að Baugur sé síður en svo hættur eða sé eitthvað að slaka á í kaupum á fyrirtækjum í kjölfar ákæranna á hendur forstjóranum og fimm öðrum tengdum fyrirtækinu.