Sáttir við verðið

Rúmir sextíu og sex milljarðar fást fyrir Landssímann. Skipti ehf. sem er að mestu í eigu bræðranna í Bakkavör og KB banka átti hæsta tilboðið. Tilboðin voru opnuð á Nordica hóteli í dag. Skrifað verður undir samninga í næstu viku að óbreyttu. Alls uppfylltu tólf hópar með samtals þrjátíu og fimm fjárfestum skilyrði nefndarinnar um að mega bjóða í Símann. Þrír hópar buðu. Ef einungis fimm prósenta verðmunur yrði á tilboðum átti að gera fundarhlé, en í millitíðinni gætu bjóðendur skilað inn hærri tilboðum. Þess gerðist engin þörf því himinn og haf var á milli tilboða. Eignarhaldsfélagið Skipti var reiðubúið að greiða tæpa sextíu og sjö milljarða fyrir Símann en auk þess yfirtekur það skuldir upp á sjö til átta milljarða. Að félaginu standa, Exista sem er í eigu bræðranna í Bakkavör, og á fjörutíu og fimm prósent, Kaupþing banki með þrjátíu prósenta hlut, Lífeyrissjóður Verslunarmanna og Lífeyrissjóðurinn Gildi með rúman átta prósenta hlut, auk annarra með rúman tveggja prósenta hlut eða minna. En mega neytendur eiga von á minni þjónustu eða hærri símreikningum. Erlendur Hjaltason segir ekki hægt að tjá sig um rekstur fyrirtækisins að svo stöddu en á þó ekki von á miklum breytingum. Erlendur Hjaltason segir að þeir séu sáttir við verðið og telur fyrirtækið með mikla möguleika.  Ekki hefur verið rætt hver verður forstjóri fyrirtækisins. Símstöðin í eigu Burðaráss, KEA, Einnar stuttrar, Talsímafélagsins og Tryggingamiðstöðvarinnar bauð næst hæst eða rúma sextíu milljarða. Það tilboð fól í sér samning við Almenning ehf. um að öllum Íslendingum verði gefinn kostur á að kaupa samtals 30% hlut í Símanum í opnu útboði, um leið og fært þykir að skrá Símann á markaði. Friðrik Jóhannsson spurður um hvort að hópur hans hefði ráðið við verðið að það væri alltaf þanning að þegar verið er að kaupa fyrirtæki þyrfti að gefa sér forsendu og þær geta verið mjög mismunandi. Hann hefði ekki verið reiðubúinn að greiða það sem fyritækið endaði í. Þá átti Nýja Símafélagið lægsta tilboðið um fimmtíu og fimm milljarða en að því standa Atorka, Mósa Straumborg og eignarhaldsfélag Frosta Bergssonar. Jón Sveinsson spurður um hvað honum fyndist um verðið, sagði að eini samanburðuinn sem hann hafði var veriðið 2001 og benti á að verðið væri viðunandi fyrir riíksjóð